ନୂଆଦିଲ୍ଲୀ: କରୋନା ମହାମାରୀର ସଂକ୍ରମଣ ମଧ୍ୟରେ ଆଜି କେନ୍ଦ୍ର ସରକାର ଅନଲକ-୫ ଗାଇଡଲାଇନ ଜାରି କରିଛନ୍ତି। ଏହି ଅନଲକ-୫ରେ ସବୁଠାରୁ ବଡ଼ ନିଷ୍ପତ୍ତି ନିଆଯାଇଛି। ଗତ ମାର୍ଚ୍ଚ ମାସରୁ ଦେଶରେ ବନ୍ଦ ରହିଥିବା ସିନେମା ହଲ ଖୋଲିବାକୁ କେନ୍ଦ୍ର ସରକାର ଅନୁମତି ଦେଇଛନ୍ତି। ତେବେ ଅକ୍ଟୋବର ୧ ନୁହେଁ ବରଂ ଅକ୍ଟୋବର ୧୫ରୁ ହିଁ ଦେଶରେ ସମସ୍ତ ସିନେମା ହଲ ଖୋଲିବ। ସେହିପରି କେବଳ ୫୦% ଦର୍ଶକଙ୍କୁ ନେଇ ଏହା କାର୍ଯ୍ୟକ୍ଷମ ହେବ।
ସ୍ୱରାଷ୍ଟ୍ର ମନ୍ତ୍ରଣାଳୟର ସୂଚନା ଅନୁଯାୟୀ, କଣ୍ଟେନମେଣ୍ଟ ଜୋନ ବାହାରେ ଥିବା ସମସ୍ତ ସିନେମା ହଲ, ଥ୍ରୀଏଟର ଓ ମଲ୍ଟିପ୍ଲେକ୍ସ ଗୁଡ଼ିକ ଅକ୍ଟୋବର ୧୫ରୁ ଖୋଲିପାରିବ। ଏ ସମ୍ପର୍କରେ ଏସ୍ଓପି ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଜାରି କରାଯିବ। ରବିବାର ଦେଶର ପ୍ରଥମ ରାଜ୍ୟ ଭାବେ ପଶ୍ଚିମବଙ୍ଗ ସରକାର ଅକ୍ଟୋବର ୧ରୁ ସିନେମା ହଲ ଓ ଯାତ୍ରା ପେଣ୍ଡାଲ ଖୋଲିବାକୁ ଅନୁମତି ଦେଇଥିଲେ।
ସେହିପରି ଅକ୍ଟୋବର ୧୫ ପରେ ଦେଶରେ ସ୍କୁଲ ଗୁଡ଼ିକ ଖୋଲିବାକୁ କେନ୍ଦ୍ର ସରକାର ସର୍ତ୍ତ ମୂଳକ ଅନୁମତି ଦେଇଛନ୍ତି। ସ୍କୁଲ ଖୋଲିବାକୁ କେନ୍ଦ୍ର ସରକାର ସିଧାସଳଖ ଅନୁମତି ନ ଦେଇ ରାଜ୍ୟ କୋଟକୁ ବଲ ଫିଙ୍ଗିଛନ୍ତି। ରାଜ୍ୟ ସରକାରମାନେ କରୋନା ସ୍ଥିତିକୁ ଦୃଷ୍ଟିରେ ରଖି ସେମାନଙ୍କ ଅଞ୍ଚଳରେ ସ୍କୁଲ ଓ କୋଚିଂ ସେଣ୍ଟର ଖୋଲିବା ପାଇଁ ଅକ୍ଟୋବର ୧୫ ପରେ ନିଷ୍ପତ୍ତି ନେଇ ପାରିବେ ବୋଲି ବିଜ୍ଞପ୍ତିରେ କୁହାଯାଇଛି। ଅନ୍ୟପକ୍ଷରେ ଅକ୍ଟୋବର ୩୧ ଯାଏ କଣ୍ଟେନମେଣ୍ଟ ଜୋନରେ ଲକ୍ ଡାଉନ୍ ବଳବତ୍ତର ରହିବ ବୋଲି କୁହାଯାଇଛି।
ପୂର୍ବରୁ ଅନଲକ-୪ରେ କେନ୍ଦ୍ର ସରକାର ମେଟ୍ରୋ ସେବା ଓ ୯ରୁ ଦ୍ୱାଦଶ ଶ୍ରେଣୀର ଶିକ୍ଷାର୍ଥୀଙ୍କ ପାଇଁ କଟକଣା କୋହଳ କରିଥିଲେ। ୯ରୁ ଦ୍ୱାଦଶ ଶ୍ରେଣୀର ପିଲାମାନେ ନିଜ ଇଚ୍ଛାରେ ସ୍କୁଲ ଯାଇ ପାଠ ବୁଝି ପାରିବେ ବୋଲି କୁହାଯାଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
