ୱାଶିଂଟନ: ପୁଣିଥରେ ଭାରତର ସୀମା ବିବାଦ ପ୍ରସଙ୍ଗରେ ମୁଣ୍ଡ ଖେଳାଇଛି ଆମେରିକା। ପୂର୍ବରୁ କଶ୍ମୀର ପ୍ରସଙ୍ଗରେ ଭାରତ ଓ ପାକିସ୍ତାନ ବିବାଦର ସମାଧାନ କରିବାକୁ ମଧ୍ୟସ୍ଥତା ହେବାକୁ ଆଗ୍ରହ ଦେଖାଇଥିବା ଆମେରିକା ଏବେ ପୁଣି ସମାନ କଥା ଦୋହରାଇଛି।
ବର୍ତ୍ତମାନ ଭାରତ ଓ ଚାଇନା ମଧ୍ୟରେ ସୀମା ବିବାଦ ସୃଷ୍ଟି ହୋଇଥିବାରୁ ଆମେରିକା ରାଷ୍ଟ୍ରପତି ଡୋନାଲ୍ଟ ଟ୍ରମ୍ପ ମଧ୍ୟସ୍ଥତା କରିବାକୁ ଆଗ୍ରହ ଦେଖାଇଛନ୍ତି। ଏନେଇ ସେ ଭାରତ ଓ ଚାଇନାକୁ ଜଣାଇ ସାରିଥିବା ମଧ୍ୟ କରିଛନ୍ତି।
ଟ୍ରମ୍ପ ଟ୍ୱିଟ କରି କହିଛନ୍ତି, “ବର୍ତ୍ତମାନ ଏଲଏସିରେ ଭାରତ ଓ ଚାଇନା ମଧ୍ୟରେ ବିବାଦ ଦେଖାଦେଇଛି। ଏହା ଉପରେ ଆମର ନଜର ରହିଛି। ଆମେ ଉଭୟ ଭାରତ ଓ ଚାଇନାକୁ ସୀମା ବିବାଦର ସମାଧାନ କରିବାରେ ସହଯୋଗ କରିବାକୁ ପ୍ରସ୍ତୁତ। ଏନେଇ ଉଭୟ ଦେଶଙ୍କୁ ମଧ୍ୟ ଅବଗତ କରାଇ ଦେଇଛୁ। ଯଦି ସେମାନେ ଚାହିଁବେ, ତା’ହେଲେ ଏହି ସୀମା ବିବାଦର ସମାଧାନ ପାଇଁ ଆମେରିକା ମଧ୍ୟସ୍ଥତା କରିବ। ଆମେରିକା ମଧ୍ୟସ୍ଥତା କରିବାକୁ ପ୍ରସ୍ତୁତ ଓ ଇଚ୍ଛୁକ। ଧନ୍ୟବାଦ।”
ମେ’ ୫ରୁ ଭାରତ ଓ ଚାଇନା ମଧ୍ୟରେ ସୀମା ବିବାଦ ଆରମ୍ଭ ହୋଇଛି। ଉଭୟ ଲଦାଖ ଓ ଉତ୍ତର ସିକ୍କିମ ସୀମାରେ ଉଭୟ ଦେଶ ଅଧିକ ସଂଖ୍ୟକ ଫୋର୍ସ ମୁତୟନ କରିବାରେ ଲାଗିଛନ୍ତି।
ଦିନକୁ ଦିନ ସ୍ଥିତି ବିଗୁଡ଼ୁଥିବାରୁ ଆଜି ଟ୍ରମ୍ପ ମଧ୍ୟସ୍ଥତା ବାଣ ମାରିଛନ୍ତି। ତେବେ ଟ୍ରମ୍ପଙ୍କ ମଧ୍ୟସ୍ଥତା ପ୍ରସ୍ତାବ ସମ୍ପର୍କରେ ଭାରତ କିମ୍ବା ଚାଇନା ପକ୍ଷରୁ କୌଣସି ବିବୃତି ଜାରି କରାଯାଇନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
