କରୋନାରେ ଚାଲିଗଲେ ରାଷ୍ଟ୍ରପତି ପ୍ରାର୍ଥୀ

କଙ୍ଗୋ: ରିପବ୍ଲିକ ଅଫ୍ କଙ୍ଗୋରେ ରାଷ୍ଟ୍ରପତି ନିର୍ବାଚନ ପାଇଁ ପ୍ରଚାର ଚାଲିଛି। ଏହାରି ଭିତରେ ବିରୋଧୀ ଦଳର ପ୍ରାର୍ଥୀ ଗାୟ ବ୍ରାଇସ ପାରୁଇଟ କୋଲେଲାସଙ୍କର ବିୟୋଗ ହୋଇଛି। ଗତ ଶୁକ୍ରବାର ସେ କରୋନାରେ ସଂକ୍ରମିତ ହୋଇଥିଲେ। ତାଙ୍କୁ ଚିକିତ୍ସା ପାଇଁ ଏୟାରକ୍ରାଫ୍ଟ ଯୋଗେ ଫ୍ରାନ୍ସ ନିଆଯାଉଥିଲା। ଏହି ସମୟରେ ତାଙ୍କର ଦେହାନ୍ତ ହୋଇଛି। ନିର୍ବାଚନ ପୂର୍ବରୁ କୋଲେଲାସଙ୍କ ବିୟୋଗ କଙ୍ଗୋବାସୀଙ୍କ ପାଇଁ ଝଟକା ସାବ୍ୟସ୍ତ ହୋଇଛି।

ଫ୍ରାନ୍ସ 24ର ରିପୋର୍ଟ ଅନୁଯାୟୀ ୬୧ ବର୍ଷୀୟ ଏହି କଙ୍ଗୋ ନେତା ଡାଇବେଟିସ ରୋଗରେ ଆକ୍ରାନ୍ତ ଥିଲେ। ମୃତ୍ୟୁ ପୂର୍ବରୁ ସେ ତାଙ୍କର ସମର୍ଥକଙ୍କୁ କହିଥିଲେ, ସେ ମୃତ୍ୟୁ ସହ ଲଢ଼େଇ କରୁଛନ୍ତି। ହେଲେ ଆପଣଙ୍କୁ ସରକାର ପରିବର୍ତ୍ତନ କରିବା ପାଇଁ ଲଢ଼େଇ କରିବାକୁ ହେବ। ସେ ତାଙ୍କ ସମର୍ଥକଙ୍କୁ କହିଥିଲେ ଆପଣଙ୍କ ଆଗାମୀ ପିଢୀର ଭବିଷ୍ୟତ ପାଇଁ ନିର୍ବାଚନରେ ଲଢ଼େଇ କରିବାକୁ ହେବ।

ନିର୍ବାଚନରେ ମୋଟ୍ ୬ ଜଣ ରାଷ୍ଟ୍ରପତି ପ୍ରାର୍ଥୀ ଥିଲେ। ସେଥିମଧ୍ୟରୁ କୋଲେଲାସ, ରାଷ୍ଟ୍ରପତି ଡେନିସ ସାସେୁା ଏନଗ୍ୟୁଏସୋଙ୍କ (୭୭)ର ମୁଖ୍ୟ ପ୍ରତିଦ୍ୱନ୍ଦୀ ଥିଲେ। ୨୦୧୬ ରାଷ୍ଟ୍ରପତି ନିର୍ବାଚନରେ କୋଲେଲାସ ପରାଜିତ ହୋଇ ବିରୋଧୀ ଦଳରେ ବସିଥିଲେ। ୧୯୭୯ରୁ ସେଣ୍ଟ୍ରାଲ ଏସିଆରେ ଏବେର ରାଷ୍ଟ୍ରପତି ନିର୍ବାଚିତ ହୋଇଆସୁଛନ୍ତି।

ହେଲେ କଙ୍ଗୋର ଅନେକ ସ୍ଥାନରେ ତାଙ୍କ ବିରୋଧରେ ଜନ ଅସନ୍ତୋଷ ତେଜିଛି। ତେଣୁ କୋଲେଲାସ ରାଷ୍ଟ୍ରପତି ହେବାର ସମ୍ଭାବନା ଅଧିକ ରହିଥିଲା ବୋଲି ଜଣାପଡ଼ିଛି।

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।