ସୁପର୍‌ମା‌ର୍କେଟ୍‌ରେ ଆଖିବୁଜା ଗୁଳିମାଡ, ଜଣେ ପୁଲିସକର୍ମୀଙ୍କ ସମେତ ୧୦ ମୃତ

ୱାଶିଂଟନ: ସୁପରମାର୍କେଟ ଭିତରେ ଆଖିବୁଜା ଗୁଳିମାଡ। ଜଣେ ବନ୍ଧୁକଧାରୀ ମାର୍କେଟ ଭିତରକୁ ପଶି ଆସି ଅନ୍ଧାଧୂନ୍‌ ଗୁଳିମାଡ କରିଛି। ଏଥିରେ ଜଣେ ପୁଲିସ କର୍ମୀଙ୍କ ସମେତ ୧୦ ଜଣଙ୍କ ମୃତ୍ୟୁ ହୋଇଛି। ଆମେରିକାର କୋଲେରାଡୋ ସହରରେ ଏହି ଭୟଙ୍କର ଗୁଳିକାଣ୍ଡ ଘଟିଛି।

ଏକ ଅନ୍ତର୍ଜାତୀୟ ନ୍ୟୁଜ ଏଜେନ୍ସିର ଖବର ମୁତାବକ, ଆମେରିକାର ବୋଲ୍ଡର ସ୍ଥିତ ଏକ ସୁପରମାର୍କେଟରେ ଏହି ଗୁଳିକାଣ୍ଡ ଘଟିଛି।  ବର୍ତ୍ତମାନ ସୁଦ୍ଧା ଏଥିରେ ୧୦ ଜଣଙ୍କ ମୃତ୍ୟୁ ହୋଇସାରିଲାଣି। ମୃତକଙ୍କ ମଧ୍ୟରେ ୯ଜଣ ସାଧାରଣ ଲୋକ ଏବଂ ଜଣେ ପୁଲିସ କର୍ମଚାରୀ ଅଛନ୍ତି।

ସେପଟେ ପୁଲିସ ଏହି ଗୁଳିକାଣ୍ଡରେ ସମ୍ପୃକ୍ତ ଜଣେ ସନ୍ଦିଗ୍ଧକୁ ଗିରଫ କରିଛି। କିନ୍ତୁ ଅଭିଯୁକ୍ତ ଜଣକ କାହିଁକି ଗୁଳିମାଡ କରିଥିଲା ତାହା ବର୍ତ୍ତମାନ ସୁଦ୍ଧା ଜଣାପଡି ନାହିଁ । ପୁଲିସ ଘଟଣାର ତଦନ୍ତ ଜାରି ରଖିଛି। ସେପଟେ ଏହି ଗୁଳିକାଣ୍ଡରେ ଅଧିକାଂଶ ଲୋକ ଆହତ ହୋଇଛି। ସେମାନଙ୍କୁ ଉଦ୍ଧାର କରାଯାଇ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି।

ସୂଚନାଯୋଗ୍ୟ, ସେଠାକାର ସ୍ଥାନୀୟ ସମୟ ୨.୩୦ ମିନିଟ୍‌ରେ ବୋଲ୍ଡରର ଏକ ସୁପରମାର୍କେଟ‌ର ଭିଡ ମଧ୍ୟରେ ଜଣେ ଆତତାୟୀ ଆଖିବୁଜା ଗୁଳିମାଡ କରିଥିଲା । ସୁପର୍‌ମାର୍କେଟ୍‌ରେ ଭିଡ ଅଧିକ ଥିବାରୁ ଲୋକମାନେ ଭୟରେ ଦୌଡିବାକୁ ଲାଗିଥିଲେ ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।