କାର୍‌ ସହ ଧକ୍କା ହୋଇ ଧ୍ୱଂସ ହୋଇଗଲା ବିମାନ, ୨ ଜଣ ମୃତ

ଫ୍ଲୋରିଡା: ଶୀର୍ଷକ ପଢ଼ି ଆପଣ ନିଶ୍ଚିତ ଆଶ୍ଚର୍ଯ୍ୟ ହେଉଥିବେ। ଆକାଶରେ ଉଡ଼ୁଥିବା ବିମାନ କେମିତି ରାସ୍ତାରେ ଯାଉଥିବା ଗୋଟିଏ କାର୍‌ ସହ ଧକ୍କା ହେଲା? କିନ୍ତୁ ଫ୍ଲୋରିଡାର ପେମବ୍ରୋକ ପିନ୍ସରେ ଏମିତି ଏକ ଘଟଣା ଘଟିଛି। ଉଡ଼ାଣ ଭରିବାର କିଛି ସମୟରେ ଗୋଟିଏ ବିମାନ ରାସ୍ତା ଉପରେ ଖସି ପଡ଼ିଥିଲା। ଫଳରେ ରାସ୍ତାରେ ଯାଉଥିବା ଗୋଟିଏ କାର୍‌କୁ ଏହା ଧକ୍କା ଦେବା ପରେ ସଂପୂର୍ଣ୍ଣ ଜଳି ଯାଇଛି। ଏଥିରେ ୨ ଜଣଙ୍କ ମୃତ୍ୟୁ ଘଟିଥିବା ବେଳେ ଆଉ ୨ ଜଣ ଆହତ ହୋଇଛନ୍ତି। ଏହି କ୍ରାଶ ବେଳର ଦୃଶ୍ୟ କ୍ୟାମେରାରେ କଏଦ ହୋଇଛି।

ପୁଲିସ୍‌ର ସୂଚନା ଅନୁଯାୟୀ, ସିଙ୍ଗଲ ଇଞ୍ଜିନ ବିଶିଷ୍ଟ ବୀଚକ୍ରାଫ୍ଟ ବୋନାଜା ଏୟାରକ୍ରାଫ୍ଟ ସ୍ଥାନୀୟ ସମୟ ୩ଟା ବେଳେ ଉତ୍ତର ପେରୀ ବିମାନ ବନ୍ଦରରୁ ଉଡ଼ାଣ ଆରମ୍ଭ କରିଥିଲା। ତେବେ ମାତ୍ର କିଛି ସେକେଣ୍ଡ ମଧ୍ୟରେ ଏହା ଯାନ୍ତ୍ରିକ ତ୍ରୁଟିର ସମ୍ମୁଖୀନ ହୋଇ ଏୟାରପୋର୍ଟ ନିକଟ ଦେଇ ଯାଇଥିବା ରାସ୍ତା ଉପରେ ଖସି ପଡ଼ିଥିଲା।

ଏହି ସମୟରେ ଜଣେ ମହିଳା ଓ ତାଙ୍କ ଛୁଆ କାର୍‌ରେ ଯାଉଥିଲେ। ବିମାନଟି କାର୍‌କୁ ଧକ୍କା ଦେବା ପରେ ରାସ୍ତାରେ ମାଡ଼ ହୋଇଥିଲା। ଫଳରେ ଏଥିରେ ନିଆଁ ଲାଗି ଯାଇଥିଲା। ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲେ ହେଁ ସେତେବେଳେକୁ ବିମାନଟି ସଂପୂର୍ଣ୍ଣ ଧ୍ୱଂସ ପାଇଯାଇଥିଲା।

ବିମାନଟି ସଂପୂର୍ଣ୍ଣ ଜଳି ଯାଇଥିବାରୁ ଏଥିରେ ଥିବା ଦୁଇ ଜଣ ପ୍ରାଣ ହରାଇଛନ୍ତି। ସେହିପରି କାର୍‌ରେ ଥିବା ମହିଳା ଓ ତାଙ୍କ ଛୁଆକୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ଅବସ୍ଥା ଏବେ କେମିତି ଅଛି, ସେ ବିଷୟରେ ପୁଲିସ କିମ୍ବା ପ୍ରଶାସନ ପକ୍ଷରୁ କିଛି ବି ସୂଚନା ଦିଆଯାଇନାହିଁ। ତଥାପି ସ୍ଥାନୀୟ ଅଞ୍ଚଳରୁ ସାମ୍ନାକୁ ଆସିଥିବା ଭିଡିଓ ଅନୁଯାୟୀ, ଏକାଧିକ ଆମ୍ବୁଲାନ୍ସ ଓ ଦମକଳ ବାହିନୀ ଘଟଣାସ୍ଥଳରେ ଉପସ୍ଥିତ ରହି ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରୁଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।