କସଗଞ୍ଜ: ପୁଣି ଜଣେ ବିଜେପି ବିଧାୟକଙ୍କ ପୁଅଙ୍କ ଦାଦାଗିରି ଦେଖିବାକୁ ମିଳିଛି। ଉତ୍ତର ପ୍ରଦେଶ ବିଜେପି ବିଧାୟକ ଦେବେନ୍ଦ୍ର ସିଂହ ରାଜପୁତଙ୍କ ପୁଅ ଯଶବୀର ସୋରନ ଘାଟ ପୁଲିସ୍ ଷ୍ଟେସନର ଅଧିକାରୀଙ୍କୁ ନାଲି ଆଖି ଦେଖାଇବା ସହ ବଦଳି କରିଦେବେ ବୋଲି ଧମକ ଦେଇଛନ୍ତି। ଲୋକଙ୍କ ସହ ଝଗଡ଼ା କରୁଥିବା ଅଭିଯୋଗରେ ସୋରନ ଘାଟ ପୁଲିସ୍ ଦୁଇ ଜଣ ଆମ୍ବୁଲାନ୍ସ ଡ୍ରାଇଭରଙ୍କୁ ଗିରଫ କରି ଥାନାକୁ ଆଣିଥିଲା।
ଏହାର ମାତ୍ର କିଛି ଘଣ୍ଟା ମଧ୍ୟରେ ଯଶବୀର ଓ ତାଙ୍କ ସମର୍ଥକମାନେ ଥାନାରେ ପହଞ୍ଚି ଉକ୍ତ ଦୁଇ ଡ୍ରାଇଭରଙ୍କୁ ଛାଡ଼ିବାକୁ ଦାବି କରିଥିଲେ। ଥାନା ଅଧିକାରୀ ଏଥିରେ ରାଜି ନ ହେବାରୁ ଯଶବୀର ନିଜର ଉପରୁ ନିୟନ୍ତ୍ରଣ ହରାଇ ବସିଥିଲେ।
ସେ ଥାନା ଅଧିକାରୀଙ୍କୁ ନାଲି ଆଖି ଦେଖାଇବା ସହ ନିଜ ସୀମାରେ ରହି କାର୍ଯ୍ୟ କରିବାକୁ ଧମକ ଦେଇଥିଲେ। ଯଦି ଥାନା ଅଧିକାରୀ ଏକଥା ନ ଶୁଣିବେ, ତା’ହେଲେ ତାଙ୍କର ବଦଳି ଅନ୍ୟତ୍ର କରିଦେବାକୁ ମଧ୍ୟ ସେ ଧମକ ଦେଇଥିଲେ। ତେବେ ଏ ସମ୍ପର୍କରେ ସବିଶେଷ ବିବରଣୀ ରିପୋର୍ଟ ଲେଖା ହେବା ଯାଏ ଜଣାପଡ଼ିନାହିଁ।