ଆଫଗାନିସ୍ତାନରେ ଆତ୍ମଘାତୀ ବିସ୍ଫୋରଣ: ୩୩ ମୃତ, ୮୦ ଆହତ

କାବୁଲ:ଆଫଗାନିସ୍ତାନର ପୂର୍ବରେ ଥିବା ଜଲାଲାବାଦ ସହରରେ ଶନିବାର ଏକ ବ୍ୟାଙ୍କରେ ଆତ୍ମଘାତୀ ଆକ୍ରମଣରେ ୩୩ ଜଣ ପ୍ରାଣ ହରାଇଛନ୍ତି। ୮୦ରୁ ଅଧିକ ଲୋକ ଆହତ ହୋଇଛନ୍ତି। ଆହତମାନଙ୍କ ମଧ୍ୟରୁ ଅନେକ ଅବସ୍ଥା ଗୁରୁତର ରହିଛି। ଆକ୍ରମଣକାରୀମାନେ ଏକ ମୋଟରସାଇକେଲ୍ରେ ବିସ୍ଫୋରକ ରଖିଥିଲେ। ସେମାନେ ଉଭୟ ସେନାର ଯବାନ ଓ ସାଧାରଣ ଲୋକଙ୍କୁ ଟାର୍ଗେଟ କରି ଏହି ବିସ୍ଫୋରଣ କରିଥିଲେ। ମାସିକିଆ ଦରମା ନେବାକୁ ଲୋକେ ବ୍ୟାଙ୍କ ଆଗରେ ଜମା ହୋଇଥିବା ବେଳେ ଏହି ବିସ୍ଫୋରଣ ହୋଇଥିଲା। ଅନ୍ୟପକ୍ଷରେ କୌଣସି ଆତଙ୍କବାଦୀ ସଂଗଠନ ଏ ନେଇ ନିଜକୁ ଦାୟୀ କରି ନାହିଁ।

ସେହିପରି ଶନିବାର ଜଲାଲାବାଦରେ ଆଉ ଏକ ସ୍ଥାନରେ ବିସ୍ଫୋରଣ ହୋଇଥିଲା। ଏକ ମସଜିଦ ଆଗରେ ହୋଇଥିଲା ଏହି ବିସ୍ଫୋରଣ। ତେବେ ଏଥିରେ କେହି ହତାହତ ହୋଇନାହାନ୍ତି।

ଅନ୍ୟ ଏକ ବିସ୍ଫୋରଣର ଖବର ମଧ୍ୟ ଆସିଥିଲା। ଅବଶ୍ୟ ପରେ ଜଣାପଡ଼ିଲା ଆଫଗାନିସ୍ତାନ ସେନାର ଯବାନମାନେ ବୋମାଟିକୁ ନିଷ୍କ୍ରିୟ କଲା ବେଳେ ତାହା ଫୁଟି ଯାଇଥିଲା। ଏଥିରେ କେହି ହତାହତ ହୋଇନାହାନ୍ତି।