ମହାଲକ୍ଷ୍ମୀ ମନ୍ଦିର ନିକଟସ୍ଥ ୩ ମହଲା ବିଲଡିଂରେ ଅଗ୍ନିକାଣ୍ଡ, ଜଣେ ମୃତ, ୬୦ ଉଦ୍ଧାର

ମୁମ୍ବାଇ:ମୁମ୍ବାଇର ମହାଲକ୍ଷ୍ମୀ ମନ୍ଦିର ନିକଟରେ ଅଘଟଣ। ମନ୍ଦିର ପାଖରେ ଥିବା ଏକ ବିଲଡିଂରେ ତୃତୀୟ ମହଲାରେ ଅଗ୍ନିକାଣ୍ଡ ଘଟିବାରୁ ଜଣେ ମହିଳାଙ୍କ ମୃତ୍ୟୁ ଘଟିଛି। ଆଜି ସକାଳେ ଏହି ଘଟଣା ଘଟିଥିବା ବେଳେ ଦମକଳବାହିନୀ ପକ୍ଷରୁ ନିଆଁଲିଭା ଯାଇଛି।

ଉଦ୍ଧାରକାରୀ ଦଳ ପକ୍ଷରୁ ୬୦ ଜଣଙ୍କୁ ତୁରନ୍ତ ଉଦ୍ଧାର କରାଯାଇଛି। ତେବେ ନିଆଁଜନିତ ଧୂଆଁରେ ଫସି ରହିଥିବା ୧୯ ଜଣ ଗୁରୁତର ହୋଇଛନ୍ତି। ସେମାନଙ୍କୁ ନାୟାର ହସ୍‌ପିଟାଲରେ ଭର୍ତ୍ତି କରାଯାଇଛି। ମିଳିଥିବା ସୂଚନା ଅନୁଯାୟୀ, ରାତି ୩ଟାରୁ ଉକ୍ତ ବିଲଡିଂରେ ନିଆଁ ଲାଗିଥିଲା।

ବିଦ୍ୟୁତ୍‌ ଶର୍ଟସର୍କିଟ୍‌ ଯୋଗୁ ନିଆଁ ଲାଗିଥିବା ଜଣାପଡ଼ିଛି। ତେବେ ନିଆଁରୁ ରକ୍ଷାପାଇବା ପାଇଁ ଲୋକେ ୩ ମହଲା ବିଲଡିଂରୁ ଦଉଡ଼ା ଦଉଡ଼ି କରି ଆସୁଥିବା ବେଳେ ପ୍ରବଳ ଧୂଆଁରେ କେତେକ ଅଣନିଃଶ୍ୱାସୀ ହୋଇପଡ଼ିଥିଲେ।