ପୁଣି ଦାନା ବାନ୍ଧୁଛି ବାତ୍ୟା : ଏଥର ଓଡ଼ିଶା ମୁହାଁ, ୭ରୁ ୯ ବର୍ଷିବ, ଦେଖନ୍ତୁ କେଉଁ ଦିଗ ଦେଇ ଅତିକ୍ରମ କରିବ

ଭୁବନେଶ୍ୱର:(ଓଡ଼ିଶା ରିପୋର୍ଟର): ଚାଷୀଙ୍କ ପାଇଁ ପୁଣି ଘନଉଛି ବିପଦ । ବଙ୍ଗୋପସାଗରେ ସୃଷ୍ଟ ଲଘୁଚାପ ବାତ୍ୟାର ରୂପ  ନେବା ଆଶଙ୍କା ରହିଛି।  ୭ ତାରିଖ ବେଳକୁ ଲଘୁଚାପ ଡିପ୍ ଡିପ୍ରେସନ୍ କିମ୍ବା ବାତ୍ୟାରେ ପରିଣତ  ହେବା ପାଣିପାଗ ବିଭାଗ ପୂର୍ବାନୁମାନ କରିଛି। ଏହି ଖବର ଆସିବା ପରେ ଉଡିଯାଇଛି ଚାଷୀଙ୍କ ହୋସ୍ ।  ଗତମାସରେ ଅଦିନିଆ ବର୍ଷା ମାଡ଼ ଖାଇଥିବା ଚାଷୀର ଅଣ୍ଟା ସଳଖି ନ ଥିବା ବେଳେ, ପୁଣି  ଥରେ ବର୍ଷା ଆସୁଥିବା ଶୁଣି ଆତଙ୍କିତ ହୋଇପଡ଼ିଛି। ଦକ୍ଷିଣ ଭାରତରେ ଓଖିର ତାଣ୍ଡବ ପରେ ଦକ୍ଷିଣ ଓ ପୂର୍ବ ଭାରତ ପାଇଁ ପୁଣି  ଏଭଳି ବାତ୍ୟା ବିପଦ ଦେଖାଦେଇଛି।

ବଙ୍ଗୋପସାଗରରେ ସୃଷ୍ଟ ଲଘୁଚାପ  ଅଧିକ ଘନୀଭୂତ ହୋଇ ଆସନ୍ତା ୭ ତାରିଖରେ ଡିପ୍ ଡ୍ରିପେସନ୍ କିମ୍ବା ବାତ୍ୟାରେ  ପରିବର୍ତ୍ତିତ ହୋଇପାରେ।  ଏହାର ପ୍ରଭାବରେ ୭ରୁ ଦକ୍ଷିଣ ଓଡ଼ିଶାରେ ଆରମ୍ଭ ହେବ ବର୍ଷା  କୋରାପୁଟ, ମାଲକାନଗିରି, ଗଞ୍ଜାମ ଓ ଗଜପତି ଜିଲ୍ଲାରେ ହାଲକା ବର୍ଷା ହେବାର  ସମ୍ଭାବନା ରହିଛି।  ପରେ  ୮ ଓ ୯ ତାରିଖ ଦୁଇଦିନ ଧରି ଉପକୂଳ ଓ ଆଭ୍ୟନ୍ତରୀଣ  ଓ଼ଡ଼ିଶାରେ ପ୍ରବଳ ବର୍ଷା ହୋଇପାରେ।  ବିଶେଷ କରି ଭଦ୍ରକ, ବାଲେଶ୍ୱର, ମୟୁରଭଞ୍ଜପୁରୀ, କଟକ, କେନ୍ଦ୍ରାପଡ଼ା, ଜଗତସିଂହପୁର, ଖୋର୍ଦ୍ଧା ଜିଲ୍ଲାରେ ବର୍ଷାର ପ୍ରଭାବ ଅଧିକ  ରହିବ ବୋଲି ସୂଚନା ଦେଇଛି।

ପାଣିପାଗ ବିଭାଗର ଏ ପୂର୍ବାନୁମାନ ନେଇ ଆତଙ୍କିତ ହୋଇପଡ଼ିଛି ଚାଷୀକୂଳ।  ପ୍ରଥମେ ମରୁଡ଼ି, ତା’ ପରେ ଚକଡ଼ା ପୋକ ଓ ଗତମାସରେ ହୋଇଥିବା ଅଦିନିଆ ବର୍ଷା  ଯୋଗୁଁ ବ୍ୟାପକ କ୍ଷତି ସହିଛି ଚାଷୀ ।  ବାକି ଯାହା ଫସଲ ବଞ୍ଚିଥିଲା ତାକୁ ଅମଳ କରି  ଘରକୁ ନେବାକୁ ପ୍ରସ୍ତୁତ ହେଉଥିବା ବେଳେ ବର୍ଷା ଖବର ଛାତିରେ ଛନକା ଭରିଛି। ସେପଟେ ଶୀଘ୍ର ଅମଳ ସହ ଫସଲକୁ ସୁରକ୍ଷିତ ସ୍ଥାନରେ ସାଇତି  ରଖିବାକୁ ଚାଷୀଙ୍କୁ ପରାମର୍ଶ ଦେଇଛନ୍ତି ରାଜସ୍ୱ ମନ୍ତ୍ରୀ।

ଗତ ମାସରେ ହୋଇଥିବା ଅଦିନିଆ ବର୍ଷା ଯୋଗୁଁ ରାଜ୍ୟର ୨୫ଟି ଜିଲ୍ଲାରେ  ବ୍ୟାପକ ଧାନ ଫସଲ ନଷ୍ଟ ହୋଇଥିଲା । ସେପଟେ ସମ୍ଭାବ୍ୟ ବର୍ଷାରୁ ଫସଲକୁ କିପରି ରକ୍ଷା କରାଯାଇ ପାରିବ, ସେନେଇ  ଆସନ୍ତାକାଲି ସରକାରଙ୍କ ସହ ଆଲୋଚନା କରାଯିବ ବୋଲି ଓୟୁଏଟିର କୂଳପତି  ସୁରେନ୍ଦ୍ରନାଥ ପଶୁପାଳକ କହିଛନ୍ତି।