ଆଶାରାମ ବାପୁ ଧର୍ଷଣ ମାମଲା: ଜଣେ ସାକ୍ଷୀଙ୍କୁ ଗୁଳିମାଡ଼

ବରେଲି: ସ୍ୱଘୋଷିତ ଧର୍ମଗୁରୁ ଆଶାରାମ ବାପୁଙ୍କ ବିରୋଧରେ ଆସିଥିବା ଏକ ବଳାତ୍କାର ମାମଲାର ଜଣେ ସାକ୍ଷୀ ଉପରେ ହୋଇଛି ଗୁଳିମାଡ଼। ତାଙ୍କ ନାଁ କ୍ରିପାଲ ସିଂହ। ତାଙ୍କୁ ଗୁରୁତର ଅବସ୍ଥାରେ ବରେଲିର ଏକ ଡାକ୍ତରଖାନାରେ ଭର୍ତ୍ତି କରାଯାଇଛି। ଶୁକ୍ରବାର ବିଳମ୍ବିତ ରାତିରେ ଉତ୍ତର ପ୍ରଦେଶର ପୁୱାୟାନ ସ୍ଥିତ ନିଜ ଘରକୁ ଫେରୁଥିବା ବେଳେ ତାଙ୍କ ଉପରେ କିଛି ଦୁର୍ବୃତ୍ତ ଗୁଳି କରିଥିଲେ। ଦୁର୍ବୃତ୍ତମାନେ ବାଇକରେ ଆସିଥିଲେ। ବରେଲିର ଅତିରିକ୍ତ ସିଟି ମାଜିଷ୍ଟ୍ରେଟଙ୍କ ଠାରେ କ୍ରିପାଲ ଦେଇଥିବା ବୟାନରେ କହିଛନ୍ତି ଯେ ଆଶାରାମ ବାପୁଙ୍କ ମାମଲାକୁ ନେଇ ଗତ କିଛି ଦିନ ହେଲା ତାଙ୍କୁ ଧମକ ଦିଆଯାଇ ଆସୁଥିଲା।

ପୋଲିସ୍ ଘଟଣାର ତଦନ୍ତ କରୁଛି।

କ୍ରିପାଲ ଏକ ଟ୍ରାନ୍ସପୋର୍ଟ କଂପାନୀରେ ଚାକିରି କରନ୍ତି। ଉକ୍ତ କଂପାନୀର ମାଲିକଙ୍କ ଝିଅଙ୍କୁ ଆଶାରାମ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଛି।

ସୂଚନାଯୋଗ୍ୟ, ଚଳିତ ବର୍ଷ ଜାନୁଆରୀ ମାସରେ ଆଶାରାମ ବାପୁଙ୍କର ଜଣେ ରୋଷେୟାଙ୍କୁ ମୁଜାଫରନଗରରେ ଗୁଳି କରି ହତ୍ୟା କରାଯାଇଥିଲା।