ଆଶାରାମ ବାପୁ ମାମଲା: ମୁଖ୍ୟ ସାକ୍ଷୀ କ୍ରିପାଲ ସିଂହଙ୍କ ମୃତ୍ୟୁ

ବରେଲି: ସ୍ୱଘୋଷିତ ଧର୍ମଗୁରୁ ଆଶାରାମ ବାପୁଙ୍କ ବିରୋଧରେ ଆସିଥିବା ଏକ ବଳାତ୍କାର ମାମଲାର ସାକ୍ଷୀ କ୍ରିପାଲ ସିଂହଙ୍କର ଶନିବାର ବିଳମ୍ୱିତ ରାତିରେ ମୃତ୍ୟୁ ଘଟିଛି। ଶୁକ୍ରବାର ବିଳମ୍ବିତ ରାତିରେ ଉତ୍ତର ପ୍ରଦେଶର ପୁୱାୟାନ ସ୍ଥିତ ନିଜ ଘରକୁ ଫେରୁଥିବା ବେଳେ ତାଙ୍କ ଉପରେ କିଛି ଦୁର୍ବୃତ୍ତ ଗୁଳି କରିଥିଲେ। ତାଙ୍କୁ ଗୁରୁତର ଅବସ୍ଥାରେ ବରେଲିର ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା।

ବରେଲିର ଅତିରିକ୍ତ ସିଟି ମାଜିଷ୍ଟ୍ରେଟଙ୍କ ଠାରେ କ୍ରିପାଲ ଦେଇଥିବା ବୟାନରେ କହିଥିଲେ ଯେ ଆଶାରାମ ବାପୁଙ୍କ ମାମଲାକୁ ନେଇ ଗତ କିଛିଦିନ ହେଲା ତାଙ୍କୁ ଧମକ ଦିଆଯାଇ ଆସୁଥିଲା। ପୋଲିସ୍ ଘଟଣାର ତଦନ୍ତ କରୁଛି। ଏହି ଘଟଣାରେ ପୋଲିସ ବର୍ତ୍ତମାନ ପର୍ଯ୍ୟନ୍ତ କାହାରିକୁ ଗିରଫ କରି ନାହିଁ।

କ୍ରିପାଲ ଏକ ଟ୍ରାନ୍ସପୋର୍ଟ କମ୍ପାନୀରେ ଚାକିରି କରୁଥିଲେ। ଉକ୍ତ କମ୍ପାନୀର ମାଲିକଙ୍କ ଝିଅଙ୍କୁ ଆଶାରାମ ଯୌନ ନିର୍ଯାତନା ଦେଉଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ଚଳିତବର୍ଷ ଜାନୁୟାରୀରେ ଆଶାରାମ ବାପୁଙ୍କର ଜଣେ ରୋଷେୟାଙ୍କୁ ମୁଜାଫରନଗରରେ ଗୁଳି କରି ହତ୍ୟା କରାଯାଇଥିଲା।