ଯୋଗୀଙ୍କ ଦୀପାବଳିକୁ ନେଇ ଆପତ୍ତି ଉଠାଇଲା ବାବରୀ ମସଜିଦ କମିଟି: କହିଲେ- ୟୁପି ସରକାର ସବୁ ଧର୍ମ ପାଇଁ କାମ କରୁନାହାଁନ୍ତି

ଲକ୍ଷ୍ନୌ: ଗତକାଲି ଅଯୋଧ୍ୟାରେ ଯୋଗୀ ସରକାର ମନାଇଥିଲେ ଇତିହାସର ସବୁଠାରୁ ବଡ଼ ଦିପାବଳୀ। ହେଲେ ଏହାକୁ ନେଇ ଏବେ ଆପତ୍ତି ଉଠିବାରେ ଲାଗିଛି। ବାବରୀ ମସଜିଦ କମିଟି ସରକାରୀ ଖର୍ଚ୍ଚରେ ଭବ୍ୟ ଦୀପାବଳି ଉତ୍ସବର ଆୟୋଜନ ଓ ଭଗବାନ ରାମଙ୍କ ୧୦୮ ଫୁଟ ଉଚ୍ଚା ପ୍ରତିମା ସ୍ଥାପନ ପାଇଁ ଘୋଷଣାକୁ ନେଇ ଆପତ୍ତି ଉଠାଇଛନ୍ତି। ୟୁପି ସରକାର ସବୁ ଧର୍ମର ନ ହୋଇ ଏକ ବିଶେଷ ଧର୍ମକୁ ମାନୁଥିବା ଲୋକଙ୍କ ସରକାର ଭାବି କାମ କରୁଛନ୍ତି ବୋଲି କମିଟି ପକ୍ଷରୁ କୁହାଯାଇଛି।

ବୁଧବାର ବାବରୀ ମସଜିଦ ଆକ୍ସନ କମିଟି ବୈଠକ ବସିଥିଲା। ଏଥିରେ ମୌଲାନା ମହମ୍ମଦ ଇଦରିସ ବସ୍ତୱି ଅଧ୍ୟକ୍ଷତା କରିଥିଲେ। ବୈଠକରେ ଅଯୋଧ୍ୟାରେ ଦୀପାବଳି ପାଳନ ଓ ରାମଚନ୍ଦ୍ରଙ୍କ ପ୍ରତୀମା ନିର୍ମାଣ କାର୍ଯ୍ୟକ୍ରମ ଅଧିକ ଆଲୋଚନା ହୋଇଥିଲା। ବୈଠକ ପରେ କମିଟି ପକ୍ଷରୁ କୁହାଯାଇଛି- “ଭାରତର ସମ୍ବିଧାନ ଅନୁସାରେ ସରକାରଙ୍କ ସମ୍ପର୍କ କୌଣସି ବିଶେଷ ଧର୍ମ ସହ ନଥାଏ। ସବୁ ଧର୍ମକୁ ଆଦର କରିବା ଓ ସବୁ ଧର୍ମର ଲୋକଙ୍କୁ ସମାନ ଦୃଷ୍ଟିରେ ଦେଖିବା ସରକାରଙ୍କ କର୍ତ୍ତବ୍ୟ। ହେଲେ ଯୋଗୀ ସରକାର ଏକ ବିଶେଷ ଧର୍ମକୁ ମାନୁଥିବା ଲୋକଙ୍କ ସରକାର ଭାବି କାମ କରୁଛି।”