ରଖେ ହରି ମାରେ କିଏ: ଦଶତାଲା ଉପରୁ ଖସି ପଡ଼ିଥିବା ଶିଶୁ ବି ବଞ୍ଚିଗଲା

ନୂଆଦିଲ୍ଲୀ: କଥାରେ ଅଛି ରଖେ ହରି ମାରେ କିଏ। ଆଜି ଏହି ଉକ୍ତି ପ୍ରମାଣିତ ହୋଇଛି ଲଣ୍ଡନରେ । ପଶ୍ଚିମ ଲଣ୍ଡନରେ ଥିବା ଗ୍ରେନ୍‌ଫେଲ୍‌ ଟାୱାରରେ ଆଜି ଭୟାବହ ଅଗ୍ନିକାଣ୍ଡ ବେଳେ ହଠାତ୍‌ ୧୦ମ ଫ୍ଲୋରରୁ ଏକ ଶିଶୁ ଖସିପଡ଼ିଥିଲା। କିନ୍ତୁ ସୌଭାଗ୍ୟବଶତଃ ଶିଶୁଟି ତଳେ ପଡ଼ିବା ଆଗରୁ କେହିଜଣେ ତାକୁ ଧରିନେଇଥିଲା। ଆଉ

ମୃତ୍ୟୁମୁଖରୁ ଶିଶୁଟି ବର୍ତ୍ତି ଯାଇଥିଲା।  ଜଣେ ମହିଳା ଏହି ଘଟଣାକୁ ନିଜ ଆଖିରେ ଦେଖିଥିବା ‘ଦି ଟେଲିଗ୍ରାଫ’କୁ କହିଛନ୍ତି। ସମ୍ପୃକ୍ତ ମହିଳା ଜଣକ ଗଣମାଧ୍ୟମକୁ ଦେଇଥିବା ପ୍ରତିକ୍ରିୟା ଶୁଣିଲେ ଦେହ ଥରି ଉଠିବ । ସମିରା ଲାମରାନୀ ନାମ୍ନୀ ଏହି ମହିଳାଙ୍କ କହିବା ଅନୁଯାୟୀ, ଉକ୍ତ ଟାୱାରଟି ଅଗ୍ନିକାଣ୍ଡ ଯୋଗୁ ହୁତୁ ହୁତୁ ହୋଇ ଜଳିଥିଲା।  ଜୀବନ ରକ୍ଷା ପାଇଁ ପ୍ରାଣବିକଳରେ ସମସ୍ତେ ଇତଃସ୍ତତ ହୋଇ ଧାଇଁବା ଆରମ୍ଭ କରିଥିଲେ। ନିଆଁର ଗ୍ରାସରୁ ବର୍ତ୍ତିବା ପାଇଁ ଅସହାୟ ଅବସ୍ଥାରେ ଜଣେ ମହିଳା ଶିଶୁକୁ ବଞ୍ଚାଇବାକୁ ଉଦ୍ୟମ କରିଥିଲେ। ଏହି ସମୟରେ ଟାୱାର ତଳେ ରୁଣ୍ଡ ହୋଇଥିବା ଲୋକଙ୍କ ନଜର ପଡ଼ିଥିଲା ସେହି ଭୟଙ୍କର ଦୃଶ୍ୟ ଉପରେ।  ତଳେ ଲୋକ ଥିବା ଦେଖି ମହିଳା ଜଣକ ନିରୁପାୟ ହୋଇ ଶିଶୁଟିକୁ ଝରକା ଦେଇ ଖସାଇ ଦେଇଥିଲେ। ସମ୍ଭବତଃ ୯ମ କିମ୍ବା ୧୦ମ ତାଲାରୁ ଶିଶୁଟି ଖସିଥିବା ମହିଳା ଜଣକ କହିଛନ୍ତି। ତେବେ ଶିଶୁଟି ତଳେ ପଡ଼ିବା ପୂର୍ବରୁ କେହିଜଣେ ଭଦ୍ରବ୍ୟକ୍ତି ଆଗକୁ ଆସି ତାକୁ ଧରିନେଇଥିଲେ । ଆଉ ଶିଶୁଟି ନିଶ୍ଚିତ ମୃତ୍ୟୁମୁଖରୁ ବର୍ତ୍ତି ଯାଇଥିଲା।

କେବଳ ଏହି ଗୋଟିଏ ଘଟଣା ନୁହେଁ, ୬ଷ୍ଠ ତାଲାରୁ ମଧ୍ୟ କେହିଜଣେ ମହିଳା ତା’ର ୫ ବର୍ଷ  ପୁଅକୁ ବଞ୍ଚାଇବା ପାଇଁ ଖସାଇ ଦେଇଥିବା ପଡ଼ୋଶୀ ଜାରା ନାମ୍ନୀ ମହିଳା କହିଛନ୍ତି। ହେଲେ ପିଲାଟି ବଞ୍ଚିଛି କି ନାହିଁ ତାଙ୍କ ପାଖରେ ସେ ଖବର ନାହିଁ।

(ସୌଜନ୍ୟ ଦି ଟେଲିଗ୍ରାଫ)