ପରୀକ୍ଷାରେ କପିକୁ ନେଇ ପୁଣି ଚର୍ଚ୍ଚାରେ ବିହାର

ଛପରା: ପରୀକ୍ଷାରେ ଛାତ୍ରଛାତ୍ରୀମାନେ କପି କରିବା ଏକ ସାଧାରଣ ଘଟଣା। ହେଲେ ଏହି କପି ଲୁଚାଛପାରେ ହୋଇଥାଏ। ହେଲେ ବିହାରରେ କୌଣସି ପରୀକ୍ଷା ହେଲେ କପି ଖୁଲମ୍‌ଖୁଲା ହେବା ଏକ ଅଭ୍ୟାସରେ ପରିଣତ ହୋଇଗଲାଣି। ଯୁକ୍ତଦୁଇ ପରୀକ୍ଷାରେ କପି କରି ଟପ କରିଥିବା ବିହାରର ଦୁଇ ଛାତ୍ରଛାତ୍ରୀଙ୍କ ଘଟଣା ସାରା ଦେଶରେ ଚର୍ଚ୍ଚାର ବିଷୟ ହୋଇଥିଲା। ଏବେ ଛପରାର ଜୟପ୍ରକାଶ ବିଶ୍ୱ ବିଦ୍ୟାଳୟରେ ସ୍ନାତକ ଡିଗ୍ରୀ ପରୀକ୍ଷାରେ ଖୋଲାଖୋଲି କପି ଚାଲିଥିବାର ଅଭିଯୋଗ ହୋଇଛି।

ପରୀକ୍ଷା କେନ୍ଦ୍ରରେ ଲାଗିଥିବା ସିସିଟିଭି କ୍ୟାମେରାରେ କପି କରାଯିବାର ଭିଡିଓ ରେକର୍ଡ କରାଯାଇଛି। ସବୁଠାରୁ ବଡ କଥା ହେଲେ ପରୀକ୍ଷା କେନ୍ଦ୍ରରେ ଶିକ୍ଷକ ଉପସ୍ଥିତି ଏହି କପି ଚାଲିଥିଲା।

ଯୁକ୍ତ ଦୁଇ ପରୀକ୍ଷାରେ କପି କରି ଦୁଇ ଛାତ୍ର ଟପ୍‌ ହେବା ଘଟଣା ପରେ ରାଜ୍ୟ ସରକାର କପି ରୋକିବାକୁ କଡା ପଦକ୍ଷେପ ଗ୍ରହଣ କରିଛନ୍ତି। କପି କରୁଥିବା ଛାତ୍ରଛାତ୍ରୀ ଏବଂ ସେମାନଙ୍କୁ ସହଯୋଗ କରୁଥିବା ବ୍ୟକ୍ତି ବିଶେଷଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବାକୁ ବ୍ୟବସ୍ଥା କରାଯାଇଛି। ହେଲେ ଏହାର ପ୍ରଭାବ ଦେଖିବାକୁ ମିଳୁ ନ ଥିବା ଅଭିଯୋଗ ହେଉଛି।