ବ୍ୟବସାୟୀଙ୍କୁ ମାରପିଟ୍ ଘଟଣା: କୋର୍ଟରେ ହାଜର ହେଲେ ସୈଫ୍ ଅଲ୍ଲୀ ଖାଁ

ନୂଆଦିଲ୍ଲୀ: ୨୦୧୨ରେ ତାଜ୍ ହୋଟଲରେ ଜଣେ ବ୍ୟବସାୟୀଙ୍କୁ ମାରପିଟ୍ କରିଥିବା ଘଟଣାରେ ଗୁରୁବାର ସୈଫ୍ ଅଲ୍ଲୀ ଖାଁ ମୁମ୍ୱାଇର କିଲା କୋର୍ଟରେ ହାଜର ହୋଇଛନ୍ତି । ଏହି ଶୁଣାଣି ସମୟରେ କୋର୍ଟ ସୈଫଙ୍କ ନିକଟରେ ମଧ୍ୟସ୍ଥତା ପ୍ରସ୍ଥାବ ରଖିଥିଲେ । ସୈଫ୍ ଏହି ପ୍ରସ୍ତାବକୁ ସ୍ୱୀକାର କରିଛନ୍ତି। ଦୁଇ ପକ୍ଷ ମଧ୍ୟସ୍ଥତାରେ ମୋହର ଲଗାଇବା ପାଇଁ ୨୭ ଜୁଲାଇରେ ପୁଣି କୋର୍ଟରେ ହାଜର ହେବେ। ଗତ ଶୁଣାଣି ସମୟରେ ସୈଫ୍ ବିଦେଶରେ ସୁଟିଂରେ ଥିବାରୁ ଆସିପାରି ନ ଥିଲେ ।

ସୂଚନାଯୋଗ୍ୟ, ୨୨ ଫେବୃୟାରୀ ୨୦୧୨ରେ ତାଜ୍ ହୋଟଲରେ ମାରପିଟ୍ ଘଟଣାରେ ସୈଫଙ୍କ ନାମରେ ମାମଲା ରୁଜୁ ହୋଇଥିଲା । ସୈଫ୍ ତାଙ୍କ ଦୁଇ ବନ୍ଧୁଙ୍କ ସହ ଡିନର ପାଇଁ ତାଜ୍ ହୋଟେଲକୁ ଯାଇଥିଲେ । ହେଲେ କୌଣସି କଥାକୁ ନେଇ ଏନଆରଆଇ ଇକବାଲ ଶର୍ମାଙ୍କ ସହ ତାଙ୍କର ପାଟିତୁଣ୍ଡ ହୋଇଥିଲା। ଇକବାଲ୍ ଏହି ଘଟଣାକୁ ନେଇ ସ୍ଥାନୀୟ ପୋଲିସ ଷ୍ଟେସନରେ ଅଭିଯୋଗ କରିଥିଲେ । ସେତେବେଳେ ପୋଲିସ ସୈଫ ଓ ତାଙ୍କର ଦୁଇ ସାଙ୍ଗକୁ ଗିରଫ କରିଥିଲା । ପରେ ସେମାନେ ଜାମିନରେ ଯାଇଥିଲେ ।