ଲିଙ୍ଗରାଜଙ୍କ ଗର୍ଭଗୃହ ଫଟୋ ଭାଇରାଲ୍‌ କଲେ କେନ୍ଦ୍ରମନ୍ତ୍ରୀ

ଭୁବନେଶ୍ୱର (ଓଡ଼ିଶା ରିପୋର୍ଟର): ଗତକାଲି ଥିଲା ଉତ୍କଳ ଦିବସ। ସାରା ରାଜ୍ୟ ଉତ୍ସାହର ସହ ଉତ୍କଳ ଦିବସ ପାଳନ କରିଥିଲା। କେନ୍ଦ୍ର ସରକାରଙ୍କର ବହୁ ମନ୍ତ୍ରୀ ମଧ୍ୟ ଟ୍ୱିଟ୍‌ କରି ଓଡ଼ିଶାବାସୀଙ୍କୁ ଉତ୍କଳ ଦିବସର ଶୁଭେଚ୍ଛା ଜଣାଇଥିଲେ। ଏପରି ଶୁଭେଚ୍ଛା ଜଣାଇ ଏବେ ବିବାଦରେ ଛନ୍ଦି ହୋଇପଡ଼ିଛନ୍ତି କେନ୍ଦ୍ର ସଂସଦୀୟ ବ୍ୟାପର ରାଷ୍ଟ୍ରମନ୍ତ୍ରୀ ବିଜୟ ଗୋଏଲ୍‌। ସେ ଗତକାଲି ପ୍ରଭୁ ଲିଙ୍ଗରାଜଙ୍କ ଗର୍ଭଗୃହର ଫଟୋ ଟ୍ୱିଟ୍‌ରେ ପୋଷ୍ଟ କରି ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଥିଲେ। ଏଥିରେ ସେ ଗର୍ଭଗୃହରେ ପୂଜା କରୁଥିବା ଦେଖିବାକୁ ମିଳୁଛି। ଏହାସହ ଲିଙ୍ଗରାଜ ମନ୍ଦିର ପରିସରର ଫଟୋ ମଧ୍ୟ ସେ ସେୟାର କରିଛନ୍ତି।

ଲିଙ୍ଗରାଜ ମନ୍ଦିରକୁ କ୍ୟାମେରା ଓ ମୋବାଇଲ ନେବା ଉପରେ କଟକଣା ରହିଛି। ଏହାସତ୍ତ୍ୱେ ଫଟୋ କେମିତି ଉଠିଲା ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି।

ସୂଚନାଯୋଗ୍ୟ, ଏହି ଫଟୋଗୁଡିକ ଗତବର୍ଷର। ଫଟୋ କିଏ ଉଠାଇ ଥିଲା ତାହା ସ୍ପଷ୍ଟ ହୋଇନାହିଁ।


ଏହି ଘଟଣାରେ ମନ୍ଦିର ପ୍ରଶାସନ ଓ ପୂଜକଙ୍କ ଉପରେ ଦୋଷ ଲଦିଛି ରାଜ୍ୟ ବିଜେପି। ବିଜେପି ସାଧାରଣ ସଂପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ ଲିଙ୍ଗରାଜ ମନ୍ଦିରରେ ଫଟୋ ଉଠାଯାଏନି ବୋଲି ମନ୍ତ୍ରୀଙ୍କୁ କେହି କହିନଥିଲେ। ଭାରତର ଅନେକ ପ୍ରାଚୀନ ମନ୍ଦିରରେ ଫଟୋ ଉଠାଯାଇଥାଏ। ଏଠି ଫଟୋ ଉଠାଯାଏନି ବୋଲି ମନ୍ଦିର ପ୍ରଶାସନ ମନ୍ତ୍ରୀଙ୍କୁ କହିବା କଥା। ଅଜାଣତରେ ଏମିତି ଘଟିଛି।
କଂଗ୍ରେସ ନେତା ସୁର ରାଉତରାୟ କହିଛନ୍ତି, ମନ୍ତ୍ରୀ ତୁରନ୍ତ ଇସ୍ତଫା ଦିଅନ୍ତୁ। ପ୍ରଧାନମନ୍ତ୍ରୀ ତାଙ୍କୁ ମନ୍ତ୍ରିମଣ୍ଡଳରୁ ବହିଷ୍କାର କରନ୍ତୁ।