ଚୀନକୁ ଆର୍ଥିକ ଧକ୍କା, ବଢ଼ୁଛି ବେରୋଜଗାର

ନୂଆଦିଲ୍ଲୀ: ଦୀର୍ଘ ୧୭ ବର୍ଷ ପରେ ଚୀନରେ ବଢ଼ିଛି ବେରୋଜଗାର । ଆମେରିକା ସହ ଚୀନର ଚାଲିଥିବା ଟ୍ରେଡ ୱାରର ପ୍ରଭାବ ଘରୋଇ କମ୍ପୀନୀଙ୍କ ଉପରେ ପଡିଥିବା ଅର୍ଥ ବିଶାରଦ ମାନେ ଆକଳନ କରିଛନ୍ତି । ଚୀନର ସରକାରୀ ସୂତ୍ରରୁ ସୂଚନା ମିଳିଛି ଯେ ୨୦୧୯ର ପ୍ରଥମ ଦୁଇ ମାସରେ ଇଣ୍ଡଷ୍ଟ୍ରିଆଲ ଆଉଟପୁଟ ୧୭ ବର୍ଷ ପରେ ନିମ୍ନ ସ୍ତରକୁ ଖସିଛି । ଏଥିସହ ବେରୋଜଗାର ଡିସେମ୍ବରରେ ୪.୯ ପ୍ରତିଶତ ଥିବାବେଳେ ଫେବୃଆରୀରେ ଏହା ୫.୩ ପ୍ରତିଶତ ହୋଇଛି ।

ତେବେ ଏହି ଖରାପ ସ୍ଥିତିରୁ ମୁକୁଳିବା ପାଇଁ ଚୀନ ସରକାର ବିଭିନ୍ନ ପଦକ୍ଷେପ ନେଉଛନ୍ତି । ଟ୍ଯାକ୍ସ ସହିତ ଋଣ ହାର କମ କରିଛନ୍ତି ସରକାର ହେଲେ ଏଯାଏଁ ସ୍ଥିତିରେ କୌଣସି ପରିବର୍ତ୍ତନ ଆସିନାହିଁ । ଉପଭୋକ୍ତା ମୂଲ୍ଯ ସୂଚକାଙ୍କ ଗତମାସରେ ନିମ୍ନସ୍ତରକୁ ଖସିଥିଲା । ଫେବୃଆରୀରେ ଏହା ୧.୫ ପ୍ରତିଶତ ଥିବା ବେଳେ ଜାନୁଆରୀରେ ଏହା ୧.୭ ପ୍ରତିଶତ ହୋଇଥିଲା । ଲଗାତର ଚତୁର୍ଥ ମାସ ପାଇଁ ଉପଭୋକ୍ତା ସୂଚକାଙ୍କ କମ ରହିଛି ଯାହାକି ଚୀନ ସରକାର ପାଇଁ ଶକ୍ତ ଧକ୍କା ବୋଲି ଆଲୋଚନା ହେଉଛି ।

ଚୀନର ଅଭିବୃଦ୍ଦି ହାର ୨୦୧୮ରେ ୬.୬ ଥିଲା ଯାହାକି ଦୀର୍ଘ ୨୮ ବର୍ଷରେ ସବୁଠୁ କମ୍ । ଚଳିତଥର ଅଭିବୃଦ୍ଧି ହାର ୬.୫୦ ପ୍ରତିଶତ ରହିବ ବୋଲି ଆକଳନ କରିଛି ଚୀନ । ସୂଚନାଯୋଗ୍ଯ ସାରା ବିଶ୍ବରେ ଚୀନ ନିଯୁକ୍ତି ଦେବାରେ ସବୁଠୁ ବଡ଼ ଦେଶ ଯିଏକି ପ୍ରତିଦନ ୫୦ ହଜାର ନିଯୁକ୍ତି ଦିଏ । ହେଲେ ଏବେ ଆମେରିକା ସହିତ ଟ୍ରେଡ଼ ୱାର ପାଇଁ ଚୀନର ଅର୍ଥନୀତି ଏକ ପ୍ରକାର ଭୁଶୁଡ଼ି ପଡିଛି ।