ମର୍ଣ୍ଣିଂୱାକ୍ କରୁଥିବା ବେଳେ ପୂର୍ବତନ ନ୍ୟୁଜ୍ ଆଙ୍କରଙ୍କ ଉପରେ ଭାଙ୍ଗି ପଡ଼ିଲା ନଡ଼ିଆ ଗଛ, ସିସିଟିଭିରେ ଦୁର୍ଘଟଣାର ଦୃଶ୍ୟ

ମୁମ୍ବାଇ: କ୍ଲୋଜ୍ ସର୍କିଟ୍ କ୍ୟାମେରାରେ ମୃତ୍ୟ ବେଳର ମର୍ମନ୍ତୁଦ ଦୃଶ୍ୟ। ଦୃଶ୍ୟଟି ଦେଖି ଆପଣଙ୍କ ଦେହ ଥରିଯାଇ ପାରେ। ରାସ୍ତାକଡ଼ର ଏକ ଦୋକାନରେ ଲାଗିଥିବା ସିସିଟିଭିରେ ଏହି ଦୃଶ୍ୟ ରେକର୍ଡ ହୋଇଛି। ଘଟଣାଟି ଘଟିଛି ମୁମ୍ବାଇର ସ୍ୱସ୍ତିକ ପାର୍କ ନିକଟରେ। ଜଣେ ମହିଳା ପ୍ରାତଃ ଭ୍ରମଣ କରୁଥିବା ବେଳେ ରାସ୍ତା କଡ଼ରେ ଥିବା ଏକ ନଡ଼ିଆ ଗଛ ହଠାତ୍ ତାଙ୍କ ମୁଣ୍ଡ ଉପରେ ପଡ଼ି ଯାଇଥିଲା। ଗଭୀର ଆଘାତ ଲାଗିବାରୁ  ମହିଳା ଜଣଙ୍କ ସେଇଠି ହିଁ ସଙ୍ଗେ ସଙ୍ଗେ ମୃତ୍ୟୁବରଣ କରିଥିଲେ। ମହିଳା ଜଣକ ଦୂରଦର୍ଶନର ଜଣେ ପୂର୍ବତନ ନ୍ୟୁଜ ଆଙ୍କର। ତାଙ୍କ ନାଁ କାଞ୍ଚନ ଯାଦବ।

ଗଛଟି ତାଙ୍କ ଉପରେ ହଠାତ୍ କେମିତି ପଡ଼ିଲା ତାହା ସ୍ପଷ୍ଟ ହୋଇନାହିଁ। ତାକୁ କେହି କାଟୁଥିଲେ କିମ୍ବା ଏହାର ମୂଳ ଦୁର୍ବଳ ଥିଲା ତାହା ଜଣାପଡ଼ି ନଥିଲେ ବି କେହିକେହି କହୁଛନ୍ତି ବର୍ଷାରେ ମୂଳ ହୁଗୁଳି ଯାଇଥିବାରୁ ଏହା ହଠାତ୍ ଭାଙ୍ଗି ପଡ଼ିଥିଲା। କାଞ୍ଚନଙ୍କ ଉପରେ ଗଛଟି ପଡ଼ିଯିବା ପରେ ସେ ସଙ୍ଗେ ସଙ୍ଗେ ସେନ୍ସ ହରେଇଥିଲେ। ଆଖାପାଖ ଲୋକ ତାଙ୍କୁ ସଙ୍ଗେ ସଙ୍ଗେ ଉଦ୍ଧାର କରି ମେଡିକାଲ ନେଇଥିଲେ। କିନ୍ତୁ ସେତେବେଳକୁ ତାଙ୍କ ପ୍ରାଣବାୟୁ ଉଡ଼ି ଯାଇଥିଲା।

କାଞ୍ଚନଙ୍କ ସ୍ୱାମୀ ରଜତ ନାଥ ଏହି ଘଟଣା ପାଇଁ ମୁମ୍ବାଇ ପୌରପାଳିକାକୁ ଦାୟୀ କରିଛନ୍ତି। ସେ କହିଛନ୍ତି ଯେ ନଷ୍ଟ ହୋଇ ଯାଇଥିବା ଗଛ ଗୁଡ଼ିକ କାଟିବାକୁ ବିଏମସି ଲୋକଙ୍କୁ ଅନୁମତି ନଦେବାରୁ ଏପରି ଅଘଟଣ ଘଟିଛି।