ଜିଲ୍ଲାପାଳଙ୍କ ବିବାଦୀୟ ବୟାନ: କହିଲେ ଶୌଚାଳୟ ପାଇଁ ପଇସା ନ ଥିଲେ ନିଜ ସ୍ତ୍ରୀକୁ ବିକି ଦିଅ

ନୂଆଦିଲ୍ଲୀ: ସ୍ୱଚ୍ଛ ଭାରତ କାର୍ଯ୍ୟକ୍ରମରେ ଅସ୍ୱଚ୍ଛ ଆଚରଣ। ସ୍ୱଚ୍ଛ ଭାରତ ନାମରେ ଆପତ୍ତିଜନକ ମନ୍ତବ୍ୟ ଦେଇ ବିହାରର ଜଣେ ଜିଲ୍ଲାପାଳ ଚର୍ଚ୍ଚାକୁ ଆସିଛନ୍ତି। ଗ୍ରାମାବାସୀଙ୍କୁ ତାଚ୍ଛଲ୍ୟ କରିଛନ୍ତି।  କହିଛନ୍ତି ଯଦି ପାଇଖାନା ତିଆରି ପାଇଁ ପଇସା ନାହିଁ ତେବେ ନିଜ ସ୍ତ୍ରୀକୁ ବିକିଦିଅ। ବିହାରର ଔରଙ୍ଗାବାଦ ଜିଲ୍ଲାପାଳ କନୱାଲ ତନୁଜ୍‌ଙ୍କ ଏହି ବିବାଦୀୟ ବୟାନକୁ ଦେଇ ତିବ୍ର ପ୍ରତିକ୍ରିୟା ପ୍ରକାଶ ପାଇଛି।

ସ୍ୱଚ୍ଛ ଭାରତ ଅଭିଯାନ ନେଇ ଏକ ସଚେତନତା ସଭାରେ ଯୋଗ ଦେଇ ଜିଲ୍ଲାପାଳ କନୱାଲ ଏହି ବୟାନ ଦେଇଛନ୍ତି। ଯାହା ତାଙ୍କୁ ବିବାଦ ଘେରକୁ ଟାଣିଆଣିଛି। ଶୌଚାଳୟ ନିର୍ମାଣ ପାଇଁ ଉପଦେଶ ଆଳରେ ଲୋକଙ୍କୁ ପରିହାସ କରିଥିଲେ। ଶୌଚାଳୟ ତିଆରି ପାଇଁ ଜଣେ ବ୍ୟକ୍ତି  ପଇସା ନାହିଁ କହିବାରୁ ଜବାବରେ ଜିଳ୍ଲାପାଳ ଏମିତି ଉତ୍ତର ରଖିଥିଲେ। ଖାଲିସେତିକି ନୁହେଁ ଶୌଚାଳୟ ତିଆରି କରି ମହିଳାଙ୍କ ଇଜ୍ଜତ ବଞ୍ଚାଅ ବୋଲି କହିଥିଲେ।

ଏମିତି କେଉଁ  ଗରିବ ବ୍ୟକ୍ତି ଅଛି ହାତ ଉଠାଅ ଯିଏ କହିଦେବ ତା’ର ସ୍ତ୍ରୀର ଇଜ୍ଜତ ୧୨ ହଜାର ଟଙ୍କାରୁ କମ୍ ବୋଲି ପ୍ରଶ୍ନ କରିଥିଲେ। ଏହି ଭିଡିଓ ଭାଇରାଲ ହେବା ପରେ ଜିଲ୍ଲାପାଳ ସଫେଇ ଦେଇଛନ୍ତି । କହିଛନ୍ତି ମୋ ମନ୍ତବ୍ୟକୁ ବିଭ୍ରାନ୍ତି କରାଯାଇ ସୋସିଆଲ ମିଡିଆରେ ଭାଇରାଲ କରାଯାଉଛି।