ଘରୁ ବାହାରିଲା ମାଆର କଙ୍କାଳ: ମାତ୍ର କେଇଟା ଟଙ୍କା ପାଇଁ କ’ଣ ଏମିତି କରିପାରନ୍ତି ନିଜ ପେଟର ପିଲା ?

ବାରଣାସୀ: ଅର୍ଥ ପାଇଁ ଲୋକେ ନିମ୍ନରୁ ନିମ୍ନ ସ୍ତରକୁ ଚାଲିଯାଇଥାନ୍ତି। ଏହାର ବହୁତ ଉଦାହରଣ ରହିଛି। ହେଲେ କ’ଣ କେହି ସାମାନ୍ୟ କେତେଟା ଟଙ୍କା ପାଇଁ ନିଜ ମାଆ ସହ ଏମିତି କିଛି କରିବ ଯାହା କଳ୍ପନାରେ ବି ଭାବିବା ସମ୍ଭବ ନୁହେଁ। ୧୦ ମାସ ଗର୍ଭରେ ଧରି ଯନ୍ତ୍ରଣା ସହି ଯିଏ ସଂସାରକୁ ଆଣିଥିବ ତା’ ମୁହଁରେ ନିଆଁ ନଦେଇ କେହି ପିଲା କ’ଣ ଘରେ ପକାଇ ରଖିପାରିବ? ଏହା ଶୁଣି ଆପଣଙ୍କ ଉତ୍ତର ନା ହୋଇପାରେ। ହେଲେ ଏପରି ହୋଇଛି।

ପେନ୍‌ସନ୍‌ ଟଙ୍କା ହଡ଼ପ କରିବାକୁ ନିଜ ଜନ୍ମକଲା ମାଆର ଶେଷକୃତ୍ୟ ସମ୍ପନ୍ନ ନକରି ଶବକୁ ଦିନେ ନୁହେଁ କି ଦୁଇ ଦିନ ନୁହେଁ ୫ ମାସ ହେବ ଘରେ ପକାଇ ରଖିଥିଲେ ପୁଅ ଓ ଝିଅ। ଏପରି ଘଟଣା ଘଟିଛି ବାରଣାସୀର କବୀର ନଗରରେ। ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଆଉ ଯିଏ ଏହା ଶୁଣୁଛି, ସ୍ୱତଃପ୍ରବୃତ୍ତ ଭାବେ ତାଙ୍କ ମନକୁ ଗୋଟିଏ ପ୍ରଶ୍ନ ଆସୁଛି ‘କ’ଣ ମଣିଷ ପଣିଆ ଏତେ ତଳକୁ ଖସିଯାଇ ପାରେ ?’

ଅଭିଯୋଗ ଅନୁସାରେ, କବୀର ନଗରରେ ଅମରାବତୀ ଦେବୀ ନିଜ ପିଲାଙ୍କ ସହ ରହୁଥିଲେ। ତାଙ୍କର ଗୋଟେ ପୁଅ ଓ ଗୋଟେ ଝିଅ। ସେ ମାସକୁ ୧୩,୦୦୦ ଟଙ୍କା ପେନ୍‌ସନ୍‌ ପାଉଥିଲେ। ଗତ ଜାନୁଆରୀ ୧୩ ତାରିଖରେ ତାଙ୍କର ମେଡିକାଲରେ ମୃତ୍ୟୁ ଘଟିଥିଲା। ହେଲେ ଦୁଇପିଲା ମାଆର ପେନ୍‌ସନ୍‌ ଟଙ୍କା ହଡ଼ପ କରିବାକୁ ତାଙ୍କ ମାଆର ମୃତ୍ୟୁ ଖବରକୁ ଲୁଚେଇ ରଖିଥିଲେ। କେହି ବି ଏ ବିଷୟରେ ପଚାରୁ ଥିଲେ ଗୋଟିଏ ଉତ୍ତର ଦେଉଥିଲେ। ଡାକ୍ତର ମାଆଙ୍କୁ ମୃତ ଘୋଷଣା କରିବାର କିଛି ସମୟ ପରେ ସେ ଜୀବିତ ହୋଇଯାଇଥିଲେ।

varanasiଅଲାଜୁକ ପୁଅ, ଝିଅ

ଅମରାବତୀଙ୍କ ମୃତ୍ୟୁ ହେବା ପରେ ଏହା ତାଙ୍କ ଗାଁ ଲୋକ ବି ଜାଣିଥିଲେ। ମୃତଦେହ ଘରକୁ ଆସିଥିଲା। ଗ୍ରାମବାସୀ ମିଶି କଫନ ମଧ୍ୟ ଦେଇଥିଲେ। ଯେତେବେଳେ ଶବସତ୍କାର ପାଇଁ ଗ୍ରାମବାସୀ କହିଥିଲେ କିଛି ସମୟ ଅପେକ୍ଷା କରିବାକୁ ତାଙ୍କ ପୁଅ କହିଥିଲେ। ଏହାପରେ ସେ ଅମରାବତୀ ବଞ୍ଚିଥିବା ଗାଁ ଲୋକଙ୍କୁ କହିଥିଲେ ଓ ତାଙ୍କୁ ଦେଖିବାକୁ ଘର ଭିତରକୁ କାହାରିକୁ ଛାଡି ନଥିଲେ। ଏଠାରେ କଥା ସରି ଯାଇଥିଲା। ଗ୍ରାମବାସୀ ମଧ୍ୟ ନିଜ ନିଜ ଘରକୁ ଫେରି ଯାଇଥିଲେ। ଏହା ମଧ୍ୟରେ ୫ ମାସ ବିତି ଯାଇଛି। ସେବେଠାରୁ ଅମରାବତୀଙ୍କୁ କୌଣସି ପଡ଼ୋଶୀ ଦେଖିନାହାଁନ୍ତି। ଦୁଇ ପିଲାଙ୍କ ଉପରେ ସନ୍ଦେହ କରି କିଛି ପଡ଼ୋଶୀ ପୋଲିସ୍‌କୁ ଖବର ଦେବା ପରେ ଘଟଣା ପଦାକୁ ଆସିଛି।

ଘରୁ ବାହାରିଲା କଙ୍କାଳ

ପଡ଼ୋଶୀଙ୍କ ପାଖରୁ ଫୋନ୍‌ କଲ୍‌ ପାଇ ପୋଲିସ୍‌ ଅମରାବତୀଙ୍କ ଘରେ ପହଞ୍ଚିଥିଲା। ହେଲେ ପରିବାର ଲୋକେ ପୋଲିସ୍‌କୁ ଘରେ ପୂରାଇ ଦେଇ ନଥିଲେ। ଏଥିପାଇଁ ପୋଲିସ୍‌କୁ ନାକେଦମ୍‌ ହେବାକୁ ପଡ଼ିଥିଲା। ଶେଷରେ ପୋଲିସ୍‌ ଘରେ ପସି ଯାଞ୍ଚ ଆରମ୍ଭ କରିଥିଲା। ହେଲେ ଘରୁ ଯାହା ମିଳିଥିଲା, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା। ଘର ଭିତରୁ ପୋଲିସ୍‌ ଅମରାବତୀଙ୍କ ଅଙ୍କାଳ ଜବତ କରିଥିଲା। ଏହାକୁ ଜବତ କରି ପୋଲିସ୍‌ ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି। ତାଙ୍କ ଦୁଇ ପିଲାଙ୍କୁ ଥାନାରେ ଅଟକ ରଖି ପଚରାଉଚରା କରିବା ସହ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ପ୍ରସ୍ତୁତ ହେଉଛି।

ପଚରାଉଚରା ବେଳେ ଅମରାବତୀଙ୍କ ପୁଅ, ଝିଅ ପଡ଼ୋଶୀଙ୍କୁ କହିଥିବା କଥା ପୋଲିସ୍‌ ଆଗରେ ଦୋହରାଇଛନ୍ତି। ସେମାନେ କହିଛନ୍ତି, “ମାଆ ବଞ୍ଚିଛନ୍ତି। ସେ ଏବେ କୋମାରେ ଅଛନ୍ତି। ଜଣେ ବୈଦ୍ୟ ତାଙ୍କ ଚିକିତ୍ସା କରୁଛନ୍ତି।”

ସେମାନଙ୍କ ମିଛ, ପୋଲିସ୍‌ ତଦନ୍ତରୁ ଜଣାପଡ଼ିଯିବ। ହେଲେ ମାତ୍ର କେଇଟା ଟଙ୍କା ପାଇଁ ଜନ୍ମକଲା ମାଆର ଶବ ଘରେ ପକାଇ ରଖିବା ଆମ ସମାଜ କେତେ ତଳସ୍ତରକୁ ଖସିଗଲାଣି ତାକୁ ସୂଚାଉଛି।