୨୫୦ଟି ବିମାନର ଉଡାଣ ରଦ୍ଦ କଲା ଡେଲ୍ଟା

ଡାଲାସ୍: ଡଲାସ୍‌ ଟ୍ରାଭେଲ୍ସ ପକ୍ଷରୁ ଆଜି ସକାଳୁ ୨୫୦ଟି ବିମାନର ଉଡାଣକୁ ବାତିଲ କରାଯାଇଛି। ବିମାନ ବାତିଲ କରିଦିଆଯିବାରୁ ବିଭିନ୍ନ ବିମାନବନ୍ଦରେ ଯାତ୍ରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି।

ଗତକାଲି ପାଖାପାଖି ୧,୦୦୦ ବିମାନର ଉଡାଣକୁ ବାତିଲ କରାଯାଇଥିବା ବେଳେ ୩,୦୦୦ ବିମାନ ବିଳମ୍ବ ହୋଇଥିଲା। ଆଟ୍ଲାଣ୍ଟାରେ ଥିବା କମ୍ପାନୀର ମୁଖ୍ୟାଳୟର ଯୋଗାଯୋଗ ବ୍ୟବସ୍ଥା ଅଚଳ ହୋଇପଡିବାରୁ ଏପରି ସ୍ଥିତି ଉପୁଜିଛି। ଗତକାଲି ଦୀର୍ଘ ସମୟ ଧରି ଯୋଗାଯୋଗ ବ୍ୟବସ୍ଥା ଅଚଳ ରହିବା ପରେ କିଛି ସମୟ ପାଇଁ ଯୋଗାଯୋଗ ସମ୍ଭବ ହୋଇଥିଲା। କିନ୍ତୁ ତା’ପରେ ଏହା ସମ୍ପୂର୍ଣ୍ଣ ଅଚଳ ହୋଇଯାଇଥିଲା। ଏହି ଧାରା ଆଜି ଯାଏଁ ଲାଗି ରହିଛି।

କମ୍ପାନୀର ସିଇଓ ଇଡ୍‌ ବଷ୍ଟୟାନ୍‌ ଏକ ଭଡିଓ ଜାରି କରି କହିଛନ୍ତି,“ଯୋଗାଯୋଗ ସ୍ଥାପନ କରିବାରେ ବିଫଳହେବାରୁ ଏପରି ସ୍ଥିତି ଉପୁଜିଛି। ଆମେ ଗ୍ରାହକଙ୍କୁ ଖୁବଶୀଘ୍ର ତାଙ୍କ ପ୍ରାପ୍ୟ ଅର୍ଥ ଫେରସ୍ତ କରିବୁ। ଯୋଗାଯୋଗ ବ୍ୟବସ୍ଥାରେ ଉନ୍ନତି ଆସିବା ପରେ ବିମାନସେବା ପୁଣି ଥରେ ଆରମ୍ଭ ହେବ।”