ବିଜେପି ମନ୍ତ୍ରୀଙ୍କୁ ପ୍ରଶ୍ନ କରିବାରୁ ଗିରଫ

ପାଣାଜୀ: ଗୋଆରେ ଏକଚ୍ଛତ୍ରବାଦୀ ଶାସନର ନଗ୍ନ ଚିତ୍ର ସାମ୍ନାକୁ ଆସିଛି। ଗୋଆରେ ଜଣେ ବ୍ୟକ୍ତି ବିଜେପି ମନ୍ତ୍ରୀଙ୍କୁ ନିର୍ବାଚନ ପ୍ରଚାର ବେଳେ ନଯୁକ୍ତି ସମସ୍ୟା ଉପରେ ପ୍ରଶ୍ନ କରିବାରୁ ତାଙ୍କୁ ପୁଲିସ୍‌ ଗିରଫ କରିଛି।
ଗୁରୁବାର ଉତ୍ତର ଗୋଆରେ ବିଜେପି ମନ୍ତ୍ରୀ ବିଶ୍ୱଜିତ ରାଣେ ପ୍ରଚାର କରୁଥିଲେ। ଏହି ସମୟରେ ଲୋକମାନଙ୍କ ଗହଳୀର ଥିବା ଦର୍ଶନ ଗାଓଁଙ୍କର ନାମକ ଜଣେ ବ୍ୟକ୍ତି ହଠାତ୍‌ ଛିଡ଼ା ହେବା ସହ ଶ୍ରୀ ରାଣେଙ୍କୁ ନିଯୁକ୍ତି ସମ୍ପର୍କରେ ପ୍ରଶ୍ନ କରିଥିଲେ।

ଶ୍ରୀ ରାଣେ ଚାକିରି ଦେବାକୁ ପ୍ରତିଶ୍ରୁତି ଦେଇଥିଲେ ହେଁ କାହିଁକି ଏହା ପୂରଣ ହୋଇନାହିଁ ବୋଲି ଦର୍ଶନ ସର୍ବସମ୍ମୁଖରେ ପ୍ରଶ୍ନ କରିଥିଲେ। ଦର୍ଶନ କହିଛନ୍ତି, “ ମୁଁ କେବଳ ବୈଠକରେ ମୋତେ ଦୀର୍ଘ ବର୍ଷ ହେଲା ଦିଆଯାଇଥିବା ଚାକିରି ପ୍ରତିଶୃତି କାହିଁକି ପୂରଣ ହେଲାନାହିଁ ବୋଲି ପଚାରି ଥିଲି। ଏହି କାରଣରୁ ବୈଠକ ପରେ ମୋତେ ଗିରଫ କରାଯାଇଥିଲା।”

ଭାଲପୋଇ ପୁଲିସ୍‌ ତାଙ୍କୁ ଗତକାଲି ଗିରଫ କରିବା ପରେ ଆଜି ବଣ୍ଡ ବଦଳରେ ତାଙ୍କୁ ମୁକ୍ତ କରିଛି। ଗୋଆର ଏହି ଆସନରେ ଏପ୍ରିଲ ୨୩ରେ ଭୋଟ ହେବ।