ବିବାଦୀୟ ବାବାଙ୍କ ପାଇଁ ୨ ଲକ୍ଷ ସମର୍ଥକଙ୍କ ରଣହୁଙ୍କାର: ୨୮ ଟ୍ରେନ୍ ବାତିଲ, କାଲି ସ୍କୁଲ କଲେଜ ବନ୍ଦ

ଚଣ୍ଡିଗଡ଼: ଏକ ବଳାତ୍କାର ମାମଲାରେ ଫସିଥିବା ବାବା ଗୁରୁମିତ୍‌ ରାମ ରହିମ ସିଂହଙ୍କ ପାଇଁ ଉଭୟ ହରିୟାନା ଓ ପଞ୍ଜାବରେ ଭୟଙ୍କର ପରିସ୍ଥିତି।  ଆସନ୍ତକାଲି ଦୁଷ୍କର୍ମ ମାମଲାର କୋର୍ଟରେ ରାୟ ଆସିବାକୁ ଥିବା ବେଳେ ତାହା ପୂର୍ବରୁ ବାବାଙ୍କ ହଜାର ହଜାର ସମର୍ଥକ ରାଜରାସ୍ତାକୁ ଓହ୍ଲାଇଛନ୍ତି।  ବାବାଙ୍କର ପ୍ରାୟ ୨ ଲକ୍ଷ ଅନୁଗତ ଏବେ ବାବାଙ୍କ ଆଶ୍ରମ ଚାରିପଟେ ଡେରା ପକାଇଥିବା ବେଳେ ପୋଲିସ ପାଇଁ ମୁଣ୍ଡ ବ୍ୟଥା ପାଲଟିଛି।  ଯଦି ବାବାଙ୍କ ବିରୋଧରେ ରାୟ ଆସେ ତେବେ ହିଂସାକାଣ୍ଡ ଘଟିବାର ଆଶଙ୍କା ରହିଛି।  ଉଭୟ ରାଜ୍ୟରେ ଗୁରୁତର ଆଇନ ଶୃଙ୍ଖଳା ପରିସ୍ଥିତି ସୃଶ୍ଟି ହେବା ଅଶାଙ୍କାରେ ପୋଲିସ ଆଲର୍ଟ ରହିଛି। ଏନେଇ ଉଭୟ ରାଜ୍ୟରେ ହାଇ ଆଲର୍ଟ ଜାରି କରାଯାଇଛି।

ହରିୟାଣର ସୀମାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଛି।  ଅନ୍ୟପକ୍ଷରେ ଗୁରୁବାର ଓ ଶୁକ୍ରବାର  ପଞ୍ଜାବ ଆସୁଥିବା ୨୨ଟି ଟ୍ରେନ୍‌ ଚଳାଚଳାକୁ ବାତିଲକରାଯାଇଛି। ଏଥିସହିତ ପଞ୍ଜାବ, ହରିୟାଣା ଓ ଚଣ୍ଡିଗଡ଼ରେ ୭୨ଘଣ୍ଟା ପାଇଁ ଇଣ୍ଟରନେଟ ଓ ମୋବାଇଲ ସେବାକୁ ମଧ୍ୟ ବନ୍ଦ କରା ଯାଇଥିବା ସୂଚନା ମିଳିଛି।  ସେହିପରି ଆସନ୍ତାକାଲି  ହରିୟାଣାର ସ୍କୁଲ କଲେଜ ବନ୍ଦ ରଖାଯାଇଛି।

ପରିସ୍ଥିତି ଜଟିଳି ଥିବାରୁ  ସେନା ମୁତୟନ କରାଯାଇଛି। ଯଦି ବାବାଙ୍କର କ୍ଷତି ହେଲା ଭଳି କିଛି ଘଟେ ତେବେ ପ୍ରଳୟ ହେବ ବୋଲି ସମର୍ଥକମାନେ ରଣହୁଙ୍କାର ଦେଇଛନ୍ତି।  ସୂଚନା ଅନୁଯାୟୀ ଆତ୍ମଘୋଷିତ ବାବା ରାମ ରହିମଙ୍କ ବିରୋଧରେ  ଦୁଇ ଜଣ ମହିଳା ଭକ୍ତ ବଳାତ୍କାର ଅଭିଯୋଗ ଆଣିଥିଲେ ।

ଶୁକ୍ରବାର ରାୟ ଆସିବାକୁ ଥିବାରୁ ଡେରା ଅନୁଗତଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଗୁରୁ ଅଫ୍ ବ୍ଲିଙ୍ଗ୍ ନାମରେ ପରିଚିତ  ରାମ ରହିମଙ୍କ ହଜାର ହଜାର ଅନୁଗତ  ରାସ୍ତାକୁ ଆସିଯାଇଥିବାରୁ ଦୁଇ ରାଜ୍ୟ ପକ୍ଷରୁ ଆଗୁଆ ପଦକ୍ଷେପ ନିଆଯାଇଛି । ବାବାଙ୍କ ପ୍ରଭାବ ଥିବା ଗାଁ ଗୁଡିକରେ ପ୍ରାୟ ହଜାର ହଜାର  ପୋଲିସ ମୁତୟନ କରାଯାଇଛି ।  ଡେରା ସଚ୍ଚା ସୌଦା ନାମକ ଏକ ଧର୍ମୀୟ ସଙ୍ଗଠନର ମୁଖ୍ୟ ହେଉଛନ୍ତି ରାମ ରହିମ। ୧୫ ବର୍ଷ ତଳେ ଏକ ଦୁସ୍କର୍ମ ମାମଲାରେ ଛନ୍ଦି ହୋଇଥିବା ରାମ ରହିମଙ୍କୁ ନେଇ ଆସନ୍ତା ୨୫ରେ ହରିୟାନାର ପଞ୍ଚକୁଲା ସିବିଆଇ କୋର୍ଟରେ ଚୂଡ଼ାନ୍ତ ଶୁଣାଣି ହେବ। ତେବେ ଏହାର ପୂର୍ବରୁ ପଞ୍ଚକୁଲାର ସେକ୍ଟର-୨୩ରେ ଥିବା ବାବାଙ୍କ ବାଷଗୃହ ଆଗରେ ସମର୍ଥକଙ୍କ ଭିଡ଼ ଜମିଲାଣି। ଜାକିରୁପୁର-ପଞ୍ଚକୁଲା ହାଇୱେରେ ବସ୍, ଅଟୋ ଏବଂ କାର ଆଦିର ଭିଡ଼ ଜମିଲାଣି। ବାବାଙ୍କ ଅନୁଗତମାନେ ଏସବୁ ଯାନବାହନରେ ଆସିଥିବାରୁ ଉକ୍ତ ରାଜପଥ ଲୋକାରଣ୍ୟ ପାଲଟିଛି।  ସେପଟେ ଆଇନ ଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କା କରି ଉଭୟ ପଞ୍ଜାବ ଓ ହରିୟାନା ପୋଲିସ  ସତର୍କ ହୋଇଛି।  କୌଣସି ହିଂସାକାଣ୍ଡକୁ ଏଡ଼େଇବା ପାଇଁ ପୋଲିସ ପ୍ରଶାସନ ପାଇଁ ଚାଲେଞ୍ଜ  ହୋଇଛି।  ପରିସ୍ଥିତି ଏଭଳି ହୋଇଛି ଯେ, ଚଣ୍ଡିଗଡ ସ୍ଥିତ ସେକ୍ଟର-୧୬ କ୍ରିକେଟ ଷ୍ଟାଡିୟମକୁ  ଅସ୍ଥାୟୀ ଜେଲ ଭାବେ ହାତକୁ ନେଇଛି ପୋଲିସ।   କୋର୍ଟ ଏବଂ ବାବାଙ୍କ ଘର ପାଖାପାଖି ଅଞ୍ଚଳରେ ୧୪୪ ଧାରା ଜାରି କରାଯାଇଛି।

୨୦୧୪ରେ ବାବା ଗୁରୁମିତ୍‌ ରାମ ରହିମଙ୍କ ଅଭିନୀତ ମେଷେଞ୍ଜର ଅଫ ଗଡ୍(ଏମଏସଜି) ଚଳଚ୍ଚିତ୍ରର ଟ୍ରେଲର

କିଏ ଏହି ରାମ ରହିମ

ଆତ୍ମଘୋଷିତ ବାବା ରାମ ରହିମଙ୍କ ଘର ହେଉଛି ରାଜସ୍ଥାନରେ।  ବାବା ବିବାହିତ ହୋଇଥିବା ବେଳେ ତାଙ୍କର ୩ଟି ଝିଅ ଏବଂ ଗୋଟିଏ ପୁତ୍ର ସନ୍ତାନ ଅଛି । ୫୦ ବର୍ଷୀୟ ରାମ ରହିମ ୧୯୯୦ରେ ଏକ ସତସଙ୍ଗ ଆରମ୍ଭ କରିଥିଲେ। ପରେ ସେ ବିଭିନ୍ନ ସାମାଜିକ କାର୍ଯ୍ୟରେ ନିଜକୁ ସାମିଲ କରିଥିଲେ। ୧୯୯୦ରେ ହରିୟାନାକୁ ଆସି ବାବା ନିଜର ପ୍ରଭୁତ୍ୱ ବିସ୍ତାର କରିଥିଲେ।  ଏହି ବର୍ଷ  ପଞ୍ଚକୁଲାରେ  ଡେରା ସଚ୍ଚା ସୌଦା ନାମକ ଏକ  ଆଶ୍ରମ କରି ସତସଙ୍ଗ କାର୍ଯ୍ୟକ୍ରମ କରି ଆସୁଥିଲେ।

ସତସଙ୍ଗ ଏବଂ ପ୍ରବଚନକୁ ଛାଡ଼ି ଗରିବଙ୍କୁ ବିଭିନ୍ନ ପ୍ରକାର ସହାୟତା କରି ଆସୁଥିଲେ ସେ । ବନ୍ୟା ବେଳେ ବିପନ୍ନଙ୍କୁ ସାହାଯ୍ୟ କରିବା, ଗରିବଙ୍କୁ ଖାଦ୍ୟଠାରୁ ଆରମ୍ଭ କରି ବିଭିନ୍ନ ପ୍ରକାର ସହାୟତା କାରିବା, ରୋଗୀଙ୍କୁ ସେବା ଆଦି କାର୍ଯ୍ୟକରି ସାଧାରଣ ଲୋକଙ୍କ ମନ ଜିଣିପାରିଥଲେ ସେ ।  ଫଳରେ ଧିରେ ଧିରେ ବାବାଙ୍କ  ଅନୁଗତଙ୍କ ସଂଖ୍ୟା ବଢିଲା। ଭକ୍ତ ବି ବଢିଲେ।  ଆଉ ଏହି ମଉକାରେ ବାବା ନିଜକୁ ମେଷେଞ୍ଜର ଅଫ ଗଡ୍‌ ଭାବେ ନିଜକୁ ଚିତ୍ରଣ କରିଥିଲେ।  ଏମିତି କି ସେ ‘ମେଷେଞ୍ଜର ଅଫ ଗଡ୍’ ନାମରେ ଏକ ଫିଲ୍ମ ନିର୍ମାଣ କରିଥିଲେ। ପରେ ଏହି ସିନେମାକୁ  ନେଇ ଅନେକ ବିବାଦ ହୋଇଥିଲା।

ଭିଡିଓ: ସୌଜନ୍ୟ ୟୁ-ଟ୍ୟୁବ୍‌