ଜାଲ୍ ଡିଗ୍ରୀ: ୪ ଦିନ ପୋଲିସ୍ ରିମାଣ୍ଡରେ ଗଲେ ତୋମାର

ନୂଆଦିଲ୍ଲୀ: ଜାଲ୍ ଆଇନ ଡିଗ୍ରୀ ମାମଲାରେ ଫସି ଥିବା ଆପ୍ ନେତା ତଥା ଦିଲ୍ଲୀର ପୂର୍ବତନ ଅର୍ଥମନ୍ତ୍ରୀ ଜିତେନ୍ଦ୍ର ସିଂହ ତୋମାରଙ୍କୁ ଚାରି ଦିନ ପାଇଁ ପୋଲିସ୍ ରିମାଣ୍ଡକୁ ପଠାଇ ଦିଆଯାଇଛି। ସୋମବାର କୋର୍ଟରେ ତାଙ୍କ ମାମଲାର ଶୁଣାଣି ହୋଇଥିଲା। ମାମଲା ସଂପର୍କରେ ଅଧିକ ଯାଞ୍ଚ କରିବା ପାଇଁ ତଥା ଜିତେନ୍ଦ୍ର ସିଂହ ତୋମାରଙ୍କୁ ଅଧିକ ପଚରାଉଚରା କରିବା ପାଇଁ ପୋଲିସ୍ ତାଙ୍କୁ ୮ ଦିନ ରିମାଣ୍ଡରେ ନେବା ଲାଗି କୋର୍ଟଙ୍କୂ ଆବେଦନ କରିଥିଲା।

ଦିଲ୍ଲୀ ପୋଲିସ୍ ପକ୍ଷରୁ କୋର୍ଟରେ କୁହାଯାଇଥିଲା ଯେ ତୋମାରଙ୍କୁ ବୁନ୍ଦେଲଖଣ୍ଡ ନିଆଯିବା ଜରୁରୀ। ସେଠାରେ ଯାଞ୍ଚ୍ କଲା ପରେ ମାମଲାର ସତ୍ୟତା ନେଇ ଅନେକ ତଥ୍ୟ ମିଳିବାର ସମ୍ଭାବନା ରହିଛି।

ଆଜି କୋର୍ଟରେ ହାଜର କରାଯିବା ପୂର୍ବରୁ ଦିଲ୍ଲୀ ପୋଲିସ୍ ତୋମାରଙ୍କୁ ରୋହିଣୀ ସ୍ଥିତ ୟୁନିଭର୍ସାଲ ଇନଷ୍ଟିଚ୍ୟୁଟକୁ ନିଆଯାଇଥିଲା। ଏହି ଇନଷ୍ଟିଚ୍ୟୁଟର ଜଣେ ମହିଳା ତାଙ୍କୁ ଜାଲ୍ ସାର୍ଟିଫିକେଟ୍ ଯୋଗାଇ ଦେଇଥିଲେ ବୋଲି କୁହାଯାଉଛି। ଏଠାରୁ ପୋଲିସକୁ ଅନେକ ଗୁରୁତ୍ୱପୂର୍ଣ୍ଣ ଦଲିଲ ପାଇଥିବା କୁହାଯାଉଛି।