ଝାଡ଼ଖଣ୍ଡର ଦେଓଘରରେ ଦଳାଚକଟା: ୧୧ ମୃତ, ୫୦ରୁ ଅଧିକ ଆହତ

ଦେଓଘର: ଝାଡ଼ଖଣ୍ଡର ଦେଓଘର ଜିଲ୍ଲା ଅନ୍ତର୍ଗତ ବେଲବାଗାନରେ ଥିବା ଦୁର୍ଗା ମନ୍ଦିର ନିକଟରେ ଆଜି ଭୋରରେ ଦଳାଚକଟାରେ ୧୧ ଜଣ ଲୋକଙ୍କ ମୃତ୍ୟୁ ଘଟିଥିବା ବେଳେ ୫୦ରୁ ଅଧିକ ଆହତ ହୋଇଥିବା ଜଣାପଡ଼ିଛି। ଶ୍ରାବଣ ମାସର ଦ୍ୱିତୀୟ ସୋମାବାରରେ ଏଠାରେ ଥିବା ବୈଦନାଥ ମନ୍ଦିରରେ ଲକ୍ଷାଧିକ ଲୋକ ପାଣି ଢାଳିବା ପାଇଁ ଲମ୍ବା ଲାଇନରେ ଛିଡ଼ା ହୋଇଥିବା ବେଳେ ଦୁର୍ଗା ମନ୍ଦିର ନିକଟରେ ଦଳାଚକଟା ଘଟିଥିଲା। ଦେଓଘର ଏସପି କହିଛନ୍ତି ଯେ ପ୍ରାୟ ଦେଢ଼ ଲକ୍ଷ ଶ୍ରଦ୍ଧାଳୁ ଗତକାଲି ଠାରୁ ପାଣି ଢାଳିବା ପାଇଁ ମନ୍ଦିରକୁ ଆସିଥିଲେ। ମନ୍ଦିରଠାରୁ ପ୍ରାୟ ତିନି କିଲୋମିଟର ଦୂରରେ ଶ୍ରଦ୍ଧାଳୁମାନେ ଧାଁଦୌଡ଼ କରିବାରୁ ଦଳଚକଟା ଘଟିଥିଲା। ଅନ୍ୟପକ୍ଷରେ ଏହି ଘଟଣା ପାଇଁ ଶ୍ରଦ୍ଧାଳୁମାନେ ପୋଲିସକୁ ଦାୟୀ କରିଛନ୍ତି। ପୋଲିସ୍ ଭିଡ଼କୁ ନିୟନ୍ତ୍ରଣ କରିବାକୁ ଯାଇ ଲାଠିଚାର୍ଜ କରିଥିଲା। ଫଳରେ ଶ୍ରଦ୍ଧାଳୁ ଭୟରେ ଧାଁଦୌଡ଼ା କରିଥିଲେ ଓ ଦଳାଚକଟା ହୋଇଥିଲା। ଦେଓଘର ବିଧାୟକ ନାରାୟଣଦାସ କହିଛନ୍ତି ପ୍ରଶାସନ ଓ ପୋଲିସର ଭୁଲ ଯୋଗୁ ଏଭଳି ଏକ ଅଘଟଣା ଘଟିଗଲା।