ପଠାନକୋଟ୍‌ରେ ପଶିଛନ୍ତି ୪ ଆତଙ୍କବାଦୀ! କଶ୍ମୀର ଓ ପଞ୍ଜାବରେ ହାଇଆଲର୍ଟ

ଶ୍ରୀନଗର: ପଞ୍ଜାବର ପଠାନ୍‌କୋଟ୍‌ରେ ପୁଣିଥରେ ଆତଙ୍କବାଦୀ ଆକ୍ରମଣର ଭୟ ସୃଷ୍ଟି ହୋଇଛି। ୪ ଜଣ ବ୍ୟକ୍ତି ବନ୍ଧୁକ ମୁନରେ ନିଜକୁ ସେନାର ପରିଚୟ ଦେଇ ଏକ ଗାଡ଼ି ନେଇ ଫେରାର ହୋଇଯାଇଥିବାରୁ ଏଭଳି ଆଶଙ୍କା ପ୍ରକାଶ ପାଇଛି। ଏଥିପାଇଁ ସମଗ୍ର ପଠାନକୋଟ୍‌ ଓ ଜମ୍ମୁ-କଶ୍ମୀରର କଠୁଆରେ ହାଇଆଲର୍ଟ ଜାରି କରାଯାଇଛି।

ମଙ୍ଗଳବାର ରାତିରେ ୪ ଜଣ ବ୍ୟକ୍ତି ସିଲଭର୍‌ ରଙ୍ଗର ଏକ ଇନୋଭାକୁ ଜମ୍ମୁ ରେଳ ଷ୍ଟେସନ୍‌ରୁ ଭଡ଼ାରେ ନେଇଥିଲେ। ତେବେ ମାଧୋପୁରଠାରେ ସେମାନେ ବନ୍ଧୁକ ମୁନ୍‌ରେ ଡ୍ରାଇଭରଙ୍କ ଠାରୁ ଗାଡ଼ିଟିକୁ ହ୍ୟାଇଜାକ୍ କରି ନେଇ ଚାଲିଯାଇଛନ୍ତି। ଏଯାଏ ସେମାନଙ୍କର ପତ୍ତା ମିଳିନାହିଁ।

ଡ୍ରାଇଭର ରାଜେଶ କୁମାରଙ୍କ ଠାରୁ ସବୁ କଥା ଶୁଣିବା ପରେ ରେଳ ଷ୍ଟେସନ୍‌ ଟ୍ୟାକ୍ସି ଓନର୍‌ ଆସୋସିଏସନ୍‌ର ଉପ ସଭାପତି କହିଛନ୍ତି, “ ୪ ଜଣ ଯୁବକ ଟ୍ୟାକ୍ସିଟିକୁ ମେଜର ସରଭଜିତ୍‌ ସିଂହଙ୍କ ନାଁରେ ବୁକ୍‌ କରିଥିଲେ ଏବଂ ସେମାନେ ପଠାନକୋଟ୍‌ ଯିବାକୁ ଚାହିଁଥିଲେ। ସିସିଟିଭିରୁ ଜଣାପଡ଼ିଛି ଯେ ଗାଡ଼ିରେ ୪ ଜଣ ଥିଲେ ଏବଂ ସେମାନଙ୍କ ମଧ୍ୟରୁ ଜଣେ ମଙ୍କି କ୍ୟାପ୍‌ ପିନ୍ଧିଥିଲେ।

ଗାଡ଼ି ବାବଦକୁ ସେମାନେ ୩,୫୫୦ ଟଙ୍କା ଅଗ୍ରୀମ ମଧ୍ୟ ଦେଇଥିଲେ। ସେମାନେ କଠୁଆ ଠାରେ ରାତ୍ର ଭୋଜନ କରିଥିଲେ। ଲଖନପୁର ଟୋଲ୍‌ ପ୍ଲାଜା ନିକଟରେ ସେମାନେ ନିଜକୁ ସେନା କର୍ମଚାରୀ କହି ଟିକସ ଦେଇ ନଥିଲେ। ତେବେ ଗାଡ଼ିଟି ମାଧୋପୁରଠାରେ ପହଞ୍ଚିବା ପରେ ସେମାନେ ଡ୍ରାଇଭର ରାଜେଶଙ୍କୁ ଛାଡ଼ି ଗାଡ଼ିଟିକୁ ଅପହରଣ କରି ନେଇଥିଲେ। ଡ୍ରାଇଭର ଜଣଙ୍କ ନିକଟସ୍ଥ ଥାନାରେ ଏ ସମ୍ପର୍କରେ ଜଣାଇବା ପରେ ପୂରା ଘଟଣା ସାମ୍ନାକୁ ଆସିଛି।

୨୦୧୬ରେ ଆତଙ୍କବାଦୀମାନେ ସମାନ ଢଙ୍ଗରେ କାର୍‌ ଅପହରଣ କରିବା ପରେ ପଠାନକୋଟ୍‌ ଏୟାର ବେସ୍‌ ଉପରେ ହମ୍‌ଲା କରିଥିଲେ।