କେନ୍ଦ୍ରକୁ ଘାରିଲା ମାଓ ଚିନ୍ତା : ଲାଗୁ ହେବ ଲେଫଟୱିଂ ଏକ୍ସଟ୍ରିମିଷ୍ଟ ପଲିସି

ନୂଆଦିଲ୍ଲୀ:ମାଓ ହିଂସା ରୋକିବା ସହ ମାଓ ଅଧ୍ୟୁଷିତ ଅଞ୍ଚଳରେ ଉନ୍ନତି ପାଇଁ କେନ୍ଦ୍ର ସରକାର ଲେଫଟୱିଂ ଏକ୍ସଟ୍ରିମିଷ୍ଟ ପଲିସି ଖୁବଶୀଘ୍ର ଲାଗୁ କରିବେ। କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂ ଆଜି ଦିଲ୍ଲୀରେ ଏକ ସାମ୍ୱାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି। ତେବେ ଏହି ଯୋଜନାରେ ଆଉ କଣ ସବୁ ପରିବର୍ତ୍ତନ ଦରକାର ସେଥିପାଇଁ ମାଓ ପ୍ରଭାବିତ ରାଜ୍ୟମାନକୁ ମତାମତ ମଗାଯାଇଥିବା ରାଜନାଥ କହିଛନ୍ତି। କିଛି ରାଜ୍ୟ ୟା ଉପରେ ସେମାନଙ୍କ ମତାମତ ଦେଇ ସାରିଥିବାବେଳେ ଆଉ କିଛି ରାଜ୍ୟଙ୍କ ସହ ତାଙ୍କ ବିଭାଗ ଯୋଗାଯୋଗରେ ରହିଛି। ମତାମତ ମିଳିବା ପରେ କ୍ୟାବିନେଟ୍ କମିଟି ଅନ ସିକ୍ୟୁରିଟିର ମଞ୍ଜୁର ପାଇଁ ପଠାଯିବ। ଏସବୁ ସହ ଗତ ବର୍ଷକ ଭିତରେ ଦେଶରେ ମାଓ ହିଂସା ନେଇ ତଥ୍ୟ ରଖିଛନ୍ତି ରାଜନାଥ। ବର୍ଷ ୨୦୧୩ ତୁଳନାରେ ୨୦୧୪ରେ ୨୨ ପ୍ରତିଶତ ମାଓ ହିଂସା କମିବା ସହ ମାଓବାଦୀ ଆତ୍ମସମର୍ପଣ ହାର ମଧ୍ୟ ବଢିଥିବା ରାଜନାଥ ସୂଚନା ଦେଇଛନ୍ତି।