ୟୁପି, ପଞ୍ଜାବ ଓ କର୍ଣ୍ଣାଟକ ପରେ ମହାରାଷ୍ଟ୍ର ସରକାର କଲେ କୃଷି ଋଣ ଛାଡ଼, ଓଡ଼ିଶାରେ କେବେ?

ନୂଆଦିଲ୍ଲୀ: ଉତ୍ତରପ୍ରଦେଶ, ପଞ୍ଜାବ ଏବଂ  କର୍ଣ୍ଣାଟକ ପରେ ମହାରାଷ୍ଟ୍ର ସରକାର କୃଷି ଋଣ ଛାଡ଼ କରିଛନ୍ତି । ଦେଢ଼ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ନେଇଥିବା ଚାଷୀମାନଙ୍କୁ ସଂପୂର୍ଣ୍ଣ ଛାଡ଼ କରାଯାଇଛି। ଦେଶର ଇତିହାସରେ ଏହା ସବୁଠୁ ବଡ଼ କୃଷି ଋଣ ବୋଲି କହିଛନ୍ତି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ । ଏହାଦ୍ୱାରା ରାଜ୍ୟ ସରକାରଙ୍କ ଉପରେ ୩୪ ହଜାର କୋଟି ଟଙ୍କାର ଅତିରିକ୍ତ ବୋଝ ପଡ଼ିବ। ଫଡନବିସ କହିଛନ୍ତି ଯେ, ୨୦୧୨ରୁ ରାଜ୍ୟରେ ଦୁର୍ଭିକ୍ଷ ଭଳି ସ୍ଥିତି ଦେଖାଦେଇଛି।  ଚାଷୀମାନେ ଋଣ ସୁଝିବାରେ ସକ୍ଷମ ହୋଇପାରୁ ନାହାନ୍ତି ।

ଏପରି ସ୍ଥିତିରେ ସବୁ ଦଳ ସହ ଆଲୋଚନା ପରେ ଏହି ନିଷ୍ପତି ନିଆଯାଇଛି । ଏହାଦ୍ୱାରା ୮୯ ଲକ୍ଷ ଚାଷୀ ଉପକୃତ ହେବେ । ଏହାକୁ ଛତ୍ରପତି ଶିବାଜୀ ମହାରାଜ କୃଷି ସମ୍ମାନ ଯୋଜନା ନାଁରେ ନାମିତ କରାଯାଇଛି।  ତେବେ ଇନକମ୍ ଟ୍ୟାକ୍ସ ଦେଉଥିବା ଚାଷୀମାନେ ଏହାର ଲାଭ ପାଇପାରିବେ ନାହିଁ । ଗତ କିଛି ଦିନ ହେବ କୃଷି ଋଣ ଛାଡ଼ କରିବା ଦାବିରେ ଚାଷୀମାନେ ରାଜରାସ୍ତାକୁ ଓହ୍ଲାଇଥିଲେ । ଏପଟେ ଓଡ଼ିଶାରେ ବି କୃଷି ଋଣ ଛାଡ଼ ନେଇ ଦାବି ଜୋର ଧରିବାରେ ଲାଗିଛି।  ଋଣ ଛାଡ଼ ନେଇ ବିଚାର କରାଯିବ ବୋଲି ମୁଖ୍ୟମନ୍ତ୍ରୀ ମଧ୍ୟ କହିଥିଲେ।  ତେବେ ରାଜ୍ୟରେ କେବେ  ଋଣ ଛାଡ଼ ହେଉଛି ତାହା ଦେଖିବାର ବାକି ରହିଲା।