ବାଃ ବାଃରେ ଦେଶୀ ଇଂଜିନିୟର: ୱାସିଂମେସିନ୍‌ରେ ତିଆରି କଲେ ଲସି

କମ୍‌ ଖର୍ଚ୍ଚରେ କମ୍‌ ସମୟରେ କିପରି ଅଧିକ କାମ ହୋଇପାରିବ ସେ କଳା ଭାରତୀୟଙ୍କୁ ବେଶ୍‌ ଭଲଭାବେ ଜଣା। ଭାରତୀୟମାନେ ସବୁବେଳେ କିଛିକିଛି ନୂଆ କାରନାମା କରି ବିଶ୍ୱବାସୀଙ୍କୁ ଚକିତ କରି ଦେଉଛନ୍ତି। ଏବେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହୋଇଛି ଯାହାକୁ ଦେଖିଲେ ଆପଣ ଆଶ୍ଚର୍ଯ୍ୟ ହେବା ସହ ଭାରତୀୟ ମାନଙ୍କ ବୁଦ୍ଧିକୁ ସାଲ୍ୟୁଟ କରିବେ।

ଗରମ ତାତିରୁ ଏଯାଏଁ ନିସ୍ତାର ପାଇନାହିଁ ପୂରା ଦେଶ। ବାହାରକୁ ବାହାରିବା ମାତ୍ରେ ଦରକାର ପଡୁଛି ପାଣି ବୋତଲ। ଏହି ତାତିରୁ ଲୋକଙ୍କୁ ରକ୍ଷା କରିବା ପାଇଁ ମଧ୍ୟ କିଛି ସ୍ୱେଚ୍ଛାସେବୀ ଅନୁଷ୍ଠାନ ଜଳଛତ୍ର ଖୋଲି ଲୋକଙ୍କୁ ଜଳଦାନ କରୁଛନ୍ତି। ତେବେ ଜମ୍ମୁରେ ଫ୍ରେଣ୍ଡସ୍‌ କ୍ଲବ ତରଫରୁ ଖୋଲିଥିବା ଜଳଛତ୍ରକୁ ଦେଖିଲେ ଆପଣ ଆଶ୍ଚର୍ଯ୍ୟ ହେବେ। ୪୫ ଡିଗ୍ରୀ ତାତିରୁ ରକ୍ଷା ପାଇବା ପାଇଁ ଲୋକଙ୍କୁ ଦିଆଯାଉଛି ଲସି ସର୍ବତ। ତେବେ ଲସି କେଉଁଥିରେ ପ୍ରସ୍ତୁତ ହେଉଛି ଜାଣନ୍ତି ? ଲୁଗା ସଫା ୱାସିଂମେସିନରେ। ଆଶ୍ଚର୍ଯ୍ୟ ହେଲେ ନା? କିନ୍ତୁ କଥାଟି ସତ। (ଏହି ନ୍ୟୁଜ୍‌ରେ ପୋଷ୍ଟ ହୋଇଥିବା ଭିଡିଓ ଦେଖନ୍ତୁ) ଲସି ପ୍ରସ୍ତୁତ କରିବା ପାଇଁ ପ୍ରଥମେ ୱାସିଂମେସିନ ଭିତରେ ଦହି ପକାଯାଉଛି। ପରେ ବିଭିନ୍ନ ମସଲା ପକାଇ ପାଇଁ ୱାସିଂମେସିନ ଚାଲୁ କରାଯାଉଛି। ବାସ୍‌ ଅଳ୍ପ କେଇ ସେକେଣ୍ଡ ମଧ୍ୟରେ ପ୍ରସ୍ତୁତ ହୋଇଯାଉଛି ସ୍ୱାଦିଷ୍ଟ ଲସି। ଅଳ୍ପ ସମୟ ମଧ୍ୟରେ କିପରି ଅଧିକ ଲୋକ ଲସି ପିଇ ପାରିବେ ସେଥିପାଇଁ ଏଭଳି ନିଆରା ଉପାୟ ଆପଣାଇଛନ୍ତି ଏହି ଦୁଇ ଯୁବକ। ସତରେ ଏମାନଙ୍କ ବୁଦ୍ଧିକୁ ସାଲ୍ୟୁଟ୍ ମାରିବା କଥା।