ପଡୋଶୀ ରାଷ୍ଟ୍ରଙ୍କୁ ତାକତ ଦେଖାଇଲା ଭାରତୀୟ ବାୟୁସେନା

ନୂଆଦିଲ୍ଲୀ: ଯୁଦ୍ଧ ସମୟରେ ଭାରତୀୟ ବାୟୁସେନାର ପ୍ରସ୍ତୁତି ନେଇ ସମୀକ୍ଷା କରିଛନ୍ତି ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ। ଏଥିପାଇଁ ସେ ଆସାମ ଓ ଅରୁଣାଚଳ ପ୍ରଦେଶ ଗସ୍ତ କରିଥିଲେ। ଆସାମର ଛାବୁଆ ଏୟାରବେସରେ ହୋଇଥିବା ଭାରତୀୟ ବାୟୁସେନାର ଏହି ସର୍ବବୃହତ ଅଭ୍ୟାସ ବେଳେ ୩୦୦ରୁ ଅଧିକ ଅଫିସରଙ୍କ ସହ ୧୫,୦୦୦ରୁ ଅଧିକ ବାୟୁସେନା କର୍ମଚାରୀ ଉପସ୍ଥିତ ଥିଲେ। ଏଥିସହ ନୌସେନା ଓ ସ୍ଥଳସେନାର ଅଧିକାରୀମାନେ ମଧ୍ୟ ଉପସ୍ଥିତ ଥିଲେ। ଏହାର ନାଁ ରଖାଯାଇଛି “ଗଗନଶକ୍ତି”। ସୁଖୋଇ SU 30 MKI ଫାଇଟରର୍ସ, C-17 ଗ୍ଲୋବମାଷ୍ଟର ଏୟାରକ୍ରାଫ୍ଟ ଓ MI-17 ହେଲିକପ୍ଟର ଦ୍ୱାରା ଶତ୍ରୁର ଆକ୍ରମଣ ବେଳେ କିପରି ଏହାର ଜବାବ ଦିଆଯିବ ସେ ନେଇ କୌଶଳ ପ୍ରଦର୍ଶିତ ହୋଇଥିଲା।

ଅରୁଣାଚଳ ପ୍ରଦେଶର ପାସିଘାଟ ଆଡଭାନ୍ସ ଲାଣ୍ଡିଂ ଗ୍ରାଉଣ୍ଡରେ ଦୁଇଟି ସୁଖୋଇ ଫାଇଟର ଜେଟର ଉଡାଣ ପରେ C-130J ସୁପର ହରକୁଲସ ଟ୍ରାନ୍ସପୋର୍ଟ ହେଲିକପ୍ଟର ଅବତରଣ କରିଥିଲା। ଏଥିରୁ ଗରୁଡ କମାଣ୍ଡେମାନେ ବାହାରି ପୂରା ଏୟାରବେସକୁ ନିଜ ନିୟନ୍ତ୍ରଣକୁ ନେଇଥିଲେ। ବାୟୁସେନାର ମୁଖ୍ୟ ଏୟାର ମାର୍ସାଲ ବିରେନ୍ଦ୍ର ସିଂ ଧାନୋଆ ଉପସ୍ଥିତ ରହି ସମୀକ୍ଷା କରିଥିଲେ। ବିଭିନ୍ନ ସମୟରେ ସୀମାରେ ପାକିସ୍ତାନ ଓ ଚୀନ ପକ୍ଷରୁ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି କରାଯାଉଥିବାରୁ ଭାରତ ପକ୍ଷରୁ ଏଭଳି ଆକ୍ରମଣାତ୍ମକ ପଦକ୍ଷେପ ନିଆଯାଇଛି। ଚୀନ ଓ ପାକିସ୍ତାନ ପକ୍ଷରୁ ଏକ ସମୟରେ ଆକ୍ରମଣ ହେଲେ ମଧ୍ୟ ଭାରତ ଏହାର ଜବାବ ଦେଇପାରିବ। ଭାରତୀୟ ବାୟୁସେନା ମାତ୍ର ଦୁଇ ଘଣ୍ଟା ମଧ୍ୟରେ ପଶ୍ଚିମ ସୀମାରୁ ପୂର୍ବ ସୀମାରେ ପହଞ୍ଚିପାରିବ ବୋଲି ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ କହିଛନ୍ତି।