ଆମେରିକା ରାଷ୍ଟ୍ରପତିଙ୍କୁ ମୋଦିଙ୍କ ଦେଶୀ ଗିଫ୍ଟ: ଦେଲେ ସାଲ୍ ଓ ମହୁ

ନୂଆଦିଲ୍ଲୀ: ଆମେରିକା ଗସ୍ତ ସମୟରେ ହ୍ୱାଇଟ୍ ହାଉସ୍‌ରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଓ ତାଙ୍କ ପତ୍ନୀଙ୍କ ଆତିଥେୟତାରେ ଖୁସି ହୋଇଯାଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ସେ ମଧ୍ୟ ଭୁଲି ନ ଥିଲେ ଟ୍ରମ୍ପଙ୍କ ପାଇଁ ଉପହାର ନେଇ ଯିବାକୁ। ଉପହାର ସ୍ୱରୂପ ସେ ଆମେରିକା ରାଷ୍ଟ୍ରପତିଙ୍କୁ ଦେଇଥିଲେ ଏକ ସାଲ୍। ଏହି ସାଲ୍ ହିମାଚଳ ପ୍ରଦେଶରୁ ଆସିଥିଲା। ହାତରେ ବୁଣା ହୋଇଛି ସାଲ୍‌ଟି। କେବଳ ଟ୍ରମ୍ପଙ୍କୁ ନୁହେଁ, ତାଙ୍କ ପତ୍ନୀ ମେଲାନିୟାଙ୍କୁ ମଧ୍ୟ ଉପହାର ଦେଇଥିଲେ ମୋଦି। ଉପହାର ସ୍ୱରୂପ ତାଙ୍କୁ ସିଲ୍‌ଭର୍ ବ୍ରେସ୍‌ଲେଟ୍ ଦେଇଥିଲେ। ତା’ସହିତ ଟ୍ରମ୍ପ ଦମ୍ପତିଙ୍କୁ ସେ ଚା ଓ ମହୁ ମଧ୍ୟ ଉପହାରରେ ଦେଇଥିଲେ। ପଞ୍ଜାବର ହୋଶିୟାରପୁରରେ ପ୍ରସ୍ତୁତ ହୋଇଥିବା ଏକ ସ୍ୱତନ୍ତ୍ର ଧରଣର କାଠ ବାକ୍ସକୁ ମଧ୍ୟ ମୋଦି ଉପହାର ସ୍ୱରୂପ ପ୍ରଦାନ କରିଥିଲେ ଟ୍ରମ୍ପ ଦମ୍ପତିଙ୍କୁ।

ଆମେରିକାରେ ମିଳିଥିବା ଆତିଥେୟତାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଶଂସା କରିଛନ୍ତି। ଆମେରିକା ରାଷ୍ଟ୍ରପତି, ତାଙ୍କ ପତ୍ନୀ ଓ ଝିଅକୁ ଭାରତ ଆସିବାକୁ ଆମନ୍ତ୍ରଣ କରିଛନ୍ତି ମୋଦି।