ଛୋଟା ରାଜନ୍‌କୁ ୮ ବର୍ଷ ଜେଲ

ନୂଆଦିଲ୍ଲୀ: ଅଣ୍ଡରୱାର୍ଲ୍ଡ ଡନ୍‌ ଛୋଟା ରାଜନ୍‌ ଏବଂ ଅନ୍ୟ ୪ ଜଣଙ୍କୁ ୮ ବର୍ଷ ଜେଲ୍‌ ଦଣ୍ଡରେ ଦଣ୍ଡିତ କରିଛନ୍ତି ମୁମ୍ବାଇର ଏକ ସ୍ୱତନ୍ତ୍ର କୋର୍ଟ। ୨୦୧୨ ମସିହାରେ ମୁମ୍ବାଇର ଜଣେ ହୋଟେଲ ବ୍ୟବସାୟୀଙ୍କୁ ବ୍ଲାକ୍‌ମେଲ ଓ ହତ୍ୟା ଉଦ୍ୟମ କରିବା ମାମଲାରେ ଏହି ଦଣ୍ଡବିଧାନ କରାଯାଇଛି।

ଏହା ପୂର୍ବରୁ ମୁମ୍ବାଇର ଏହି ସ୍ୱତନ୍ତ୍ର କୋର୍ଟ ଛୋଟା ରାଜନ୍‌ ଏବଂ ଅନ୍ୟ ୫ ଜଣଙ୍କୁ ଆର୍ମସ ଆକ୍ଟରେ ଦୋଷୀ ସାବ୍ୟସ୍ତ କରିଥିଲେ। କୋର୍ଟ ଆଜି ଅପରାହ୍ଣରେ ଏହି ରାୟ ଦେଇଛନ୍ତି। ଜେଲଦଣ୍ଡ ବ୍ୟତୀତ କୋର୍ଟ ଏହି ଅଣ୍ଡରୱାର୍ଲ୍ଡ ଡନ୍‌କୁ ୫ ଲକ୍ଷ ଟଙ୍କାର ଜୋରିମାନା ଦେବାକୁ ମଧ୍ୟ କହିଛନ୍ତି।

ଏହା ପୂର୍ବରୁ ସବଅର୍ବାନ୍‌ ଅନ୍ଧେରୀ ଅଞ୍ଚଳର ହୋଟେଲ ବ୍ୟବସାୟୀ ବି.ଆର. ଶେଟ୍ଟୀଙ୍କ ହତ୍ୟା ଉଦ୍ୟମ ମାମଲାରେ ସେମାନଙ୍କୁ ମହାରାଷ୍ଟ୍ର କଣ୍ଟ୍ରୋଲ ଅଫ୍‌ ଅର୍ଗାନାଇଜ୍ଡ କ୍ରାଇମ୍‌ ଆକ୍ଟ ଅଧୀନରେ ଦୋଷୀ ସାବ୍ୟସ୍ତ କରିଥିଲେ। ୨୦୧୫ ଅକ୍ଟୋବରରେ ଇଣ୍ଡୋନେସିଆରୁ ଗିରଫ ହେବା ପରେ ଛୋଟା ରାଜନ୍‌ ତିହାର ଜେଲରେ ଅଛି।