ପରାଜୟ ନିଶ୍ଚିତ ଜାଣି ବିରୋଧୀ ଇଭିଏମ୍‌ ବିରୋଧରେ ବିଷୋଦ୍‌ଗାର କରୁଛନ୍ତି: ମୋଦି

ପାଣାଜୀ: ଲୋକସଭା ନିର୍ବାଚନ ପୂର୍ବରୁ ବିଜେପି ବିରୋଧରେ ୨୩ ବିରୋଧୀ ଦଳ କୋଲକତାଠାରେ ଏକାଠି ହେବାକୁ ନେଇ ତାଚ୍ଛଲ୍ୟ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ସେ କହିଛନ୍ତି ଏହି ମହାମେଣ୍ଟ ‘ଦୁର୍ନୀତି, ନକାରାତ୍ମକତା ଏବଂ ଅସ୍ଥିରତା’କୁ ନେଇ ଗଠିତ ହୋଇଛି। ସେମାନଙ୍କର ଅବଶ୍ୟମ୍ଭାବୀ ପରାଜୟ ଏଡ଼ାଇବା ପାଇଁ ଏହି ପ୍ରୟାସ ବୋଲି ମୋଦି କହିଥିଲେ।

ପ୍ରଧାନମନ୍ତ୍ରୀ ଗୋଆଠାରେ ଏକ ବୈଠକରେ କହିଥିଲେ, “୨୦୧୯ ନିର୍ବାଚନରେ ପରାଜୟ ଆସନ୍ନ ବୋଲି ଜାଣି ବିରୋଧୀ ଦଳ ବାହାନା ଖୋଜୁଛନ୍ତି ଏବଂ ସେଥିପାଇଁ ଇଭିଏମ୍‌ ବିରୋଧରେ ବିଷେଦ୍‌ଗାର କରାଯାଉଛି।”

ମମତାଙ୍କ କୋଲକାତା ରାଲିରେ ଇଭିଏମ୍‌ ବିରୋଧୀ ସ୍ୱର ଦେଖିବାକୁ ମିଳିଥିଲା। ବିଶେଷ କରି ଫାରୁକ୍‌ ଅବଦୁଲ୍ଲା ଇଭିଏମ୍‌ ବିରୋଧରେ ମତ ଦେଇ ଏହାକୁ ଚୋର ମେସିନ୍‌ କହିଥିଲେ। ଗତବର୍ଷ ବିଜେପିର ଅଭୂତପୂର୍ବ ବିଜୟକୁ ନେଇ ବିରୋଧୀଙ୍କ ପକ୍ଷରୁ ଏପରି ଅଭିଯୋଗ ଅଣାଯାଇଥିଲା।

ଏହାର ପ୍ରତିକ୍ରିୟାରେ ବରିଷ୍ଠ ବିଜେପି ନେତା ରାମ ମାଧବ କହିଥିଲେ, “ମୁଁ ଫାରୁକ୍‌ ଅବଦୁଲ୍ଲାଙ୍କୁ ନୁହେଁ, ମୁଁ ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡ଼ର କଂଗ୍ରେସ ନେତୃମଣ୍ଡଳୀଙ୍କୁ ପଚାରିବାକୁ ଚାହେଁ ସେମାନେ କ’ଣ ଏହି ଚୋର ଇଭିଏମ୍‌ ପାଇଁ ୩ ରାଜ୍ୟର ବିଧାନସଭାରେ ଜିତିଥିଲେ।”