ନୂଆଦିଲ୍ଲୀ ଦେଖିଲା ପୁରୁଣା ଓଡ଼ିଶାର ଚିତ୍ର, ଦେଶ ଶୁଣିଲା ପାଇକ ଇତିହାସର ଗାଥା

ନୂଆଦିଲ୍ଲୀ: ନୂଆଦିଲ୍ଲୀରେ ପାଇକ ବିଦ୍ରୋହର ଗୌରବ ଗାଥା। ବ୍ରିଟିଶ୍ ଶାସନ ବିରୋଧରେ ଓଡ଼ିଆ ବୀର ପାଇକଙ୍କ ପରାକ୍ରମୀ ସଂଗ୍ରାମର କାହାଣୀ। ଏପରି କିଛି ଝଲକ ଦେଖିବାକୁ ମିଳିଥିଲା ଆଜି ଦେଶର ରାଜଧାନୀ ନୂଆଦିଲ୍ଲୀରେ।

ଦିଲ୍ଲୀରେ ଆରମ୍ଭ ହୋଇଛି ପାଇକ ବିଦ୍ରୋହର ୨ ଶହ ବର୍ଷ ପୂର୍ତ୍ତି ସମାରୋହ। ବିଜ୍ଞାନ ଭବନଠାରେ ସମାରୋହର ଶୁଭାରମ୍ଭ କରିଥିଲେ ରାଷ୍ଟ୍ରପତି ପ୍ରଣବ ମୁଖାର୍ଜୀ। କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ୍ ଓରାମ୍, ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ମହେଶ ଶର୍ମା ପ୍ରମୁଖ ଅତିଥିଭାବେ ଯୋଗ ଦେଇଥିଲେ।

ସମାରୋହରେ ପାଇକ ବିଦ୍ରୋହର ସଂଗ୍ରାମୀ ଗାଥାକୁ ବଖାଣି ଏକ ବୃତ୍ତଚିତ୍ର ପ୍ରଦର୍ଶନ କରାଯାଇଥିଲା। କେନ୍ଦ୍ର ସରକାରଙ୍କ ପକ୍ଷରୁ ଆୟୋଜିତ ଏହି ଉତ୍ସବରେ ୧୮୧୭ ମସିହାରେ ଓଡ଼ିଶା ମାଟିରେ ବ୍ରିଟିଶ୍ ସରକାର ବିରୋଧରେ ସଂଘଟିତ ଏଇ ସଶସ୍ତ୍ର ଗଣ ବିପ୍ଲବରେ ଝାସ ଦେଇଥିବା ସଂଗ୍ରାମୀ ବୀର ପାଇକଙ୍କ ଦାୟାଦ ମାନେ ମଧ୍ୟ ଏହି ସମାରୋହରେ ଉପସ୍ଥିତ ଅଛନ୍ତି।

ସମାରୋହରେ ଉଦ୍‌ବୋଧନ ଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପାଇକ ବିଦ୍ରୋହକୁ ଦେଶର ପ୍ରଥମ ସ୍ୱାଧୀନତା ସଂଗ୍ରାମର ମାନ୍ୟତା ଦେବାକୁ ଦାବି କରିଥିଲେ।

ସେ କହିଥିଲେ- “ପାଇକ ବିଦ୍ରୋହ ଥିଲା ଓଡ଼ିଆ ଜାତିର ସ୍ୱାଭିମାନର ସ୍ୱର। ଆଜି ବି ଓଡ଼ିଶାର ସ୍ୱାଭିମାନ ଜାଗ୍ରତ ରହିଛି। ଓଡ଼ିଆ ଜାତି ତା’ର ହକ୍ ପାଇଁ ଲଢ଼େଇ ଜାରି ରଖିଛି। ପାଇକ ବିଦ୍ରୋହକୁ ଦେଶର ପ୍ରଥମ ସ୍ୱାଧୀନତା ସଂଗ୍ରାମ ମାନ୍ୟତା ଦେବାକୁ ରାଜ୍ୟ କ୍ୟାବିନେଟ୍‌ରେ ପ୍ରସ୍ତାବ ପାରିତ ହୋଇଛି। ଆଶା କରୁଛୁ କେନ୍ଦ୍ର ଏହାକୁ ପ୍ରଥମ ସ୍ୱାଧୀନତା ସଂଗ୍ରାମ ମାନ୍ୟତା ଦେବ।”

ସମାରୋହକୁ ଉଦ୍‌ଘାଟନ କରିବା ପରେ ରାଷ୍ଟ୍ରପତି ମୁଖାର୍ଜୀ ପାଇକ ବିଦ୍ରୋହକୁ ଦେଶର ପ୍ରଥମ ସ୍ୱାଧୀନତା ସଂଗ୍ରାମ ବୋଲି ଅବିହିତ କରିଥିଲେ। ଏହାସହ ସେ ବକ୍ସି ଜଗବନ୍ଧୁଙ୍କ ସମେତ ବହୁ ବୀର ପାଇକଙ୍କ ନାଁ ନେଇଥିଲେ। ସେ କହିଥିଲେ- “ସିପାହୀ ବିଦ୍ରୋହର ବହୁ ପୂର୍ବରୁ ପାଇକ ବିଦ୍ରୋହ ହୋଇଥିଲା। ବିଦ୍ରୋହକୁ ଦମନ ପାଇଁ ଇଂରେଜ ବହୁ ଅତ୍ୟାଚାର କରିଥିଲେ।”

ଏହାସହ ପାଇକ ବିଦ୍ରୋହର ଡକ୍ୟୁମେଣ୍ଟେସନ କରିବାକୁ ରାଷ୍ଟ୍ରପତି କହିଥିଲେ।