ପାକିସ୍ତାନରେ ଆତଙ୍କୀ ହମଲା: ୪୩ ମୃତ, ୧୩ ଗୁରୁତର

କରାଚି: ପାକିସ୍ତାନରେ ପୁଣି ଘଟିଛି ବଡ଼ ଧରଣର ଆତଙ୍କୀ ହମଲା। ବୁଧବାର କରାଚିର ସାଫୁରା ଚୌକରେ ୬ ଜଣ ଆତଙ୍କବାଦୀ ଏକ ବସ୍ ଉପରକୁ ଆଖିବୁଜା ଗୁଳି ମାଡ଼ କରିବାକୁ ୪୩ ଜଣଙ୍କ ମୃତ୍ୟୁ ଘଟିଥିବା ବେଳେ ୧୩ ଜଣ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ୨୫ ଜଣ ପୁରୁଷ ଓ ୧୬ ଜଣ ମହିଳା ଅଛନ୍ତି। ଆହତମାନଙ୍କ ଅବସ୍ଥା ଗୁରୁତର ରହିଛି। ତେଣୁ ମୃତକଙ୍କ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି। ଏହି ଆକ୍ରମଣ ପାଇଁ ତାଲିବାନୀ ଆତଙ୍କବାଦୀ ସଂଗଠନ ନିଜକୁ ଦାୟୀ କରିଛି।

ବସଟିରେ ୬୦ରୁ ଅଧିକ ଲୋକ ଥିଲେ। ଏମାନେ ସମସ୍ତେ ସିଆ ସଂପ୍ରଦାୟର। ବସଟି ସାଫୁର ଚୌକ ଅତିକ୍ରମ କରୁଥିବା ବେଳେ ୬ ଜଣ ଆତଙ୍କବାଦୀ ବସଟିକୁ ଅଟକାଇ ଥିଲେ। ସେମାନେ ତିନିଟି ମୋଟର ସାଇକେଲରେ ଆସିଥିଲେ। ସେମାନେ ବସଟିକୁ ଅଟକାଇବା ପରେ ପ୍ରଥମେ ଡ୍ରାଇଭର ଓ କଣ୍ଡକ୍ଟରଙ୍କୁ ଗୁଳି କରିଥିଲେ। ତା’ପରେ ବସ୍ ଭିତରେ ପଶି ଆଖିବୁଜା ଗୁଳି କରିଥିଲେ।