ପାମ୍ପୋରରେ ସୁରକ୍ଷାକର୍ମୀ-ଆତଙ୍କବାଦୀ ଗୁଳିବିନିମୟ, ଜଣେ ଆତଙ୍କବାଦୀ ମୃତ

ଜମ୍ମୁ: ଜମ୍ମୁ-କାଶ୍ମୀରର ପାମ୍ପୋରରେ ତୃତୀୟ ଦିନରେ ସୁରକ୍ଷାକର୍ମୀ ଓ ଏଣ୍ଟରପ୍ରିନ୍ୟୁୟର୍‌ ଡେଭଲମେଣ୍ଟ ଇନ୍‌ଷ୍ଟିଚ୍ୟୁଟ୍‌ (ଇଡିଆଇ) କୋଠାରେ ଲୁଚି ରହିଥିବା ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ଜାରି ରହିଛି। ସୁରକ୍ଷାକର୍ମୀ କୋଠା ଭିତରେ ପଶି ଗୁଳିମାଡ଼ କରୁଥିବା ଜଣାପଡ଼ିଛି। ଏହି ଆକ୍ରମଣରେ ଆଉ ଜଣେ ଆତଙ୍କବାଦୀଙ୍କ ମୃତ୍ୟୁ ଘଟିଥିବା ସୂଚନା ଆସିଛି।

ଗତକାଲି ସନ୍ଧ୍ୟାରେ ସୁରକ୍ଷାକର୍ମୀଙ୍କ ଗୁଳିରେ ଜଣେ ଆଙ୍କବାଦୀଙ୍କ ମୃତ୍ୟୁ ଘଟିଥିଲା। ଇଡିଆଇ କୋଠାରେ ଆଉ ୨ ଜଣ ଆତଙ୍କବାଦୀ ଲୁଚି ରହିଥିବା ଆଶଙ୍କା କରାଯାଉଛି। ଅଞ୍ଚଳରେ ସେନା ପକ୍ଷରୁ ତଲାସୀ ଅଭିଯାନ ଜରି ରହିଛି।

ଜମ୍ମୁ-କାଶ୍ମୀରେ ଆତଙ୍କବାଦୀ ଆକ୍ରମଣ ଥମିବାର ନାଁ ନେଉନାହିଁ। ଗତ ଦୁଇଦିନ ହେବ ପାମ୍ପୋରରେ ସୁରକ୍ଷାକର୍ମୀ ଓ ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ଜାରି ରହିଛି।

ସୂଚନାଯୋଗ୍ୟ, ଗତ ସୋମବାର ପାମ୍ପୋର ସ୍ଥିତ ଇଡିଆଇ କୋଠା ଭିତରକୁ କିଛି ଆତଙ୍କବାଦୀ ପଶି ଆସିଥିଲେ। ଜମ୍ମୁ-ଶ୍ରୀନଗର ହାଇୱେରେ ଏହି କୋଠା ଥିବାରୁ ଏହି ରାସ୍ତାକୁ ବନ୍ଦ କରିବା ସହ ଅଞ୍ଚଳକୁ ସୁରକ୍ଷାକର୍ମୀମାନେ ଘେରାବନ୍ଦୀ କରି ରଖିଛନ୍ତି।