ଉରୀରେ ପୁଣି ଗୁଳିବିନିମୟ, ଜଣେ ଯବାନ ଶହୀଦ

ଶ୍ରୀନଗର: ଜମ୍ମୁ-କାଶ୍ମୀରର ଉରୀ ସେକ୍ଟରରେ ଆଜି ସକାଳେ ପୁଣି ଥରେ ଗୁଳିବିନିମୟ ହୋଇଛି। ପାକିସ୍ତାନୀ ସେନା ଭାରତୀୟ ପୋଷ୍ଟ ଉପରେ ପାଖିପାଖି ୨୦ମିନିଟ ଧରି ଗୁଳି ବର୍ଷଣ କରିଥିଲେ।

ମଙ୍ଗଳବାର ଉରୀ ସେକ୍ଟରର ଲଚ୍ଛୀପୁରାରେ ସେନା ଗୁଳିରେ ୮ ରୁ ୧୦ଜଣ ଆତଙ୍କବାଦୀଙ୍କ ମୃତ୍ୟୁ ହୋଇଥିଲା। ଏହି ରାତିରେ ହନ୍ଦବାଡାର ନୋଗାମ ସେକ୍ଟରରେ ପାକିସ୍ତାନିର ଅନୁପ୍ରବେଶକୁ ଅସଫଳ କରିବାରେ ଭାରତୀୟ ସେନାର ଜଣେ ଯବାନ ଶହୀଦ୍ ଓ ଦୁଇଜଣ ଆହତ ହୋଇଥିଲେ। ନୋଗାମ ଏବଂ ଉରୀ ସେକ୍ଟରରେ ସାରା ରାତି ଅପରେସନ୍ ଚାଲିଥିବା ବେଳେ ପାଗ ଖରାପ ହେବାଫଳରେ ଅପରେସନରେ ପ୍ରତିବନ୍ଧ ଦେଖାଦେବା ସହ ପାଞ୍ଚ ଜଣ ଆତଙ୍କବାଦୀ ପାକିସ୍ତାନ ଫେରିଯିବାରେ ସଫଳ ହେବାର ସୂଚନା ମିଳିଛି। ଅନୁପ୍ରବେଶ କରିଥିବା ଏହି ଆତଙ୍କବାଦୀଙ୍କ ସୁରକ୍ଷା ପାଇଁ ପାକିସ୍ତାନି ସେନା ବାରମ୍ବାର ଗୁଳିବର୍ଷଣ କରିଥିଲା। କାରଣ ଆତଙ୍କବାଦୀର ଶବକୁ ଭାରତୀୟ ସେନା ଯେପରି ପାଇବାରେ ସଫଳ ନ ହେଉ ତାହା ଥିଲା ପାକିସ୍ତାନର ଉଦ୍ଦେଶ୍ୟ।