ରୋହିଙ୍ଗ୍ୟାଙ୍କୁ ଫେରାଇ ନେବାକୁ ମିଆଁମାର୍‌ ରାଜି, ରାଜନାଥ କହିଲେ ଆପତ୍ତି ଉଠାଇବାର ମାନେ କିଛି ନାହିଁ

ନୂଆଦିଲ୍ଲୀ: ଯେଉଁ ରୋହିଙ୍ଗ୍ୟା ମୁସଲମାନ ଭାରତରେ ଅଛନ୍ତି ସେମାନେ ଶରଣାର୍ଥୀ ନୁହଁନ୍ତି। ବେଆଇନ ଭାବେ ଏମାନେ ଭାରତରେ ପ୍ରବେଶ କରିଛନ୍ତି। ଏମାନଙ୍କୁ ପ୍ରତ୍ୟାପଣ କରାଯିବାକୁ ନେଇ ଉଠୁଥିବା ପ୍ରଶ୍ନ ନିରାଧାର। ମିଆଁମାର୍‌ ଏମାନଙ୍କୁ ଫେରାଇ ନେବାକୁ ଇଚ୍ଛା ପ୍ରକାଶ କରିଛି। ଏବେ ଏମାନଙ୍କ ପ୍ରତ୍ୟାପଣରେ ସମସ୍ୟା କେଉଁଠି ରହିଲା ବୋଲି ଆଜି କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ କହିଛନ୍ତି।

ସେ ଆହୁରି କହିଛନ୍ତି, ଭାରତ ୟୁଏନ୍‌ ରିଫ୍ୟୁଜି କନ୍‌ଭେନସନ୍‌ରେ ସ୍ୱାକ୍ଷର କରିନାହିଁ। ଭାରତ ମଧ୍ୟରେ ଯେଉଁ ସମ୍ପଦ ରହିଛି, ଏହା ଉପରେ କେବଳ ଭାରତୀୟଙ୍କ ଅଧିକାର ଅଛି। ଅନ୍ୟମାନେ ମାନବାଧିକାର କଥା କହିବା ପୂର୍ବରୁ ନିଜ ମାନବାଧିକାର କଥା ଚିନ୍ତା କରନ୍ତୁ।

ସୂଚନାଯୋଗ୍ୟ ଗତ ସୋମବାର ରାଜନାଥ ରୋହିଙ୍ଗ୍ୟା ମୁସଲମାନଙ୍କୁ ଦେଶ ପାଇଁ ବିପଦ ବୋଲି କହିଥିଲେ।

ରୋହିଙ୍ଗ୍ୟା ମୁସଲମାନଙ୍କୁ ମିଆଁମାର୍‌ ଫେରାଇ ଦିଆଯିବା ନେଇ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ତେବେ ଏହାକୁ ବିରୋଧ କରି ସୁପ୍ରିମ୍‌କୋର୍ଟରେ ଏକ ଜନସ୍ୱାର୍ଥ ମାମଲା ଦାୟର ହୋଇଥିଲା। ଯାହା ଏବେ ବିଚରାଧୀନ ଅଛି। ତେଣୁ ଯାହା ନିଷ୍ପତ୍ତି ନିଆଯିବା କଥା ତାହା ସୁପ୍ରିମକୋର୍ଟ ହିଁ ନେବେ।

ଆହୁରି ପଢ଼ନ୍ତୁ: କିଏ ଏହି ରୋହିଙ୍ଗ୍ୟା ମୁସଲମାନ : ରାଜନାଥ କହିଲେ ଏମାନେ ଦେଶ ପାଇଁ ବିପଦ