ଫେସ୍‌ବୁକ୍‌ରେ ସଚିନ୍‌ କହିଲେ ‘ମନ୍‌ କୀ ବାତ୍‌’

ନୂଆଦିଲ୍ଲୀ: ଗତକାଲି ରାଜ୍ୟସଭାରେ ବିରୋଧୀ ଦଳ ସଦସ୍ୟଙ୍କ ହଙ୍ଗାମା ଯୋଗୁଁ ସଚିନ ତେନ୍ଦୁଲକର ତାଙ୍କର ପ୍ରଥମ ଭାଷଣ ରଖିପାରି ନଥିଲେ। ତେବେ ସେ ସଂସଦରେ କହିବାକୁ ଥିବା କଥାକୁ ଫେସ୍‌ବୁକ୍‌ରେ ଜାରି କରିଛନ୍ତି। ଏଥିରେ ସେ ଦେଶର କ୍ରୀଡ଼ା ଓ ଏହାର ଭବିଷ୍ୟତ ସଂପର୍କରେ ନିଜର ମତାମତ ରଖିଛନ୍ତି। କ୍ରୀଡ଼ାକୁ କ୍ୟାରିୟର ବନାଇବାକୁ ସେ ଯୁବକଯୁବତୀମାନଙ୍କୁ ପରାମର୍ଶ ଦେଇଛନ୍ତି। ସେ କହିଛନ୍ତି, ଆଜିକାଲି ଆମେ ଫିଟ୍‌ନେସ୍ ଉପରେ କମ୍ ଧ୍ୟାନ ଦେଉଛନ୍ତି ଓ ଖାଇବା-ପିଇବା ଉପରେ ଅଧିକ ଗୁରୁତ୍ୱ ଦେଉଛନ୍ତି। ଏ ସ୍ଥିତିକୁ ବଦଳାଇବାକୁ ହେବ। ଭାରତକୁ ସ୍ପୋର୍ଟସ୍ ଲଭିଂ ନେସନ୍‌ରୁ ସ୍ପୋର୍ଟସ୍ ପ୍ଲେଇଙ୍ଗ୍‌ ନେସନରେ ପରିବର୍ତ୍ତନ କରିବାକୁ ହେବ। ଏଥିପାଇଁ ଯୁବବର୍ଗଙ୍କୁ ଏଥିରେ ସାମିଲ ହେବାକୁ ପଡ଼ିବ।

ସଚିନ ଆହୁରି କହିଛନ୍ତି, ଅନ୍ତର୍ଜାତୀୟ ସ୍ତରରେ ପଦକ ଜିତୁଥିବା ପ୍ରତ୍ୟେକ ଖେଳାଳିଙ୍କୁ କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଯୋଜନା ଲାଭ ମିଳିବା ଉଚିତ। ଏଥିପାଇଁ ସରକାର ବିଶେଷ ଭାବେ ଧ୍ୟାନ ଦେବା ଉଚିତ। ଏନେଇ ସେ ପୂର୍ବତନ ହକି ଖେଳାଳି ମହମ୍ମଦ ଶାହିଦଙ୍କ ଉଦାହରଣ ଦେଇଛନ୍ତି। ସେ କହିଛନ୍ତି, ରୋଗାଗ୍ରସ୍ତ କାରଣରୁ ଅନ୍ତିମ ସମୟରେ ମହମ୍ମଦ ଶାହିଦ ଅନେକ ସମସ୍ୟାର ସମ୍ମୁଖୀନ ହୋଇଥିଲେ। ଦେଶ ପାଇଁ ସ୍ୱର୍ଣ୍ଣ, ରୌପ୍ୟ ଓ କାଂସ୍ୟ ପଦକ ଜିତିଥିବା ଖେଳାଳିଙ୍କୁ ଆମେ ଯଥେଷ୍ଟ ସମ୍ମାନ ଦେଉଛନ୍ତି କି ନାହିଁ, ସେ ସଂପର୍କରେ ବିଚାର କରିବାକୁ ପଡ଼ିବ।

ଭାଷଣ ଆରମ୍ଭରେ ସେ ନିଜ ବିଷୟରେ କହିଛନ୍ତି। ସେ କହିଛନ୍ତି, କ୍ରିକେଟ୍ ତାଙ୍କୁ ଅନେକ ମଧୁର ସ୍ମୃତି ଦେଇଛି। ତାଙ୍କ ବାପା ସ୍ୱର୍ଗତ ରମେଶ ତେନ୍ଦୁଲକରଙ୍କୁ ମନେ ପକାଇ ସଚିନ କହିଛନ୍ତି  ଯେ ସେ (ତାଙ୍କ ବାପା) ତାଙ୍କୁ ମନମୁତାବକ କ୍ୟାରିୟର ବାଛିବାକୁ ପୂରା ସ୍ୱାଧୀନତା ଦେଇଥିଲେ।

କେବଳ କ୍ରୀଡ଼ା ନୁହେଁ, ଏ ଭାଷଣରେ ସଚିନ ଦେଶର ଆର୍ଥିକ ବିକାଶ, ଗରିବୀ, ଖାଦ୍ୟ ସୁରକ୍ଷା ଓ ସ୍ୱାସ୍ଥ୍ୟରେ ସୁଧାର ଆଦି ସଂପର୍କରେ ମଧ୍ୟ କହିଛନ୍ତି। ସେହିପରି ଝିଅମାନଙ୍କୁ ଉଚିତ ସମ୍ମାନ ଦେବାକୁ ହେବ ବୋଲି ସେ କହିଛନ୍ତି। ଝିଅ ଜନ୍ମ ହେଲେ କେବଳ ଲକ୍ଷ୍ମୀ କହି ଖୁସି ହୋଇଗଲେ ଚଳିବନି, ତାକୁ ଲକ୍ଷ୍ମୀ ଭଳି ରଖିବାକୁ ମଧ୍ୟ ପଡ଼ିବ ବୋଲି ସେ କହିଛନ୍ତି। ଏ କଥା କହିବା ବେଳେ ସେ ପି.ଭି ସିନ୍ଧୁ, ମିଥାଲି ରାଜ୍, ସାନିଆ ମିର୍ଜା ଓ ସାଇନା ନେହୱାଲଙ୍କ ଉଦାହରଣ ଦେଇଛନ୍ତି।