ରାଜ୍ୟସଭାରେ ଆସନ ବଦଳିଲା ବୋଲି ଚିହିଁକି ଉଠିଲେ ସଞ୍ଜୟ ରାଉତ

ନୂଆଦିଲ୍ଲୀ: ବରିଷ୍ଠ ଶିବସେନା ନେତା ତଥା ରାଜ୍ୟସଭା ସାଂସଦ ସଞ୍ଜୟ ରାଉତଙ୍କ ଆସନ ଗୃହର ୫ ଧାଡ଼ିକୁ ଚାଲି ଯାଇଥିବାରୁ ଏହାକୁ ନେଇ ସେ ବିଜେପି ନେତୃତ୍ୱାଧୀନ ଏନ୍‌ଡିଏ ସରକାରଙ୍କୁ ଟାର୍ଗେଟ କରିଛନ୍ତି। ଏହି ଆସନ ବଦଳିବା ଘଟଣାକୁ ଆଧାର କରି ସେ ରାଜ୍ୟସଭା ଅଧ୍ୟକ୍ଷା ଭେଙ୍କୟା ନାଇଡୁଙ୍କୁ ଚିଠି ମଧ୍ୟ ଲେଖିଛନ୍ତି।

ଚିଠି ସମ୍ପର୍କରେ ସୂଚନା ଦେଇ ସଞ୍ଜୟ ରାଉତ କହିଛନ୍ତି, “ମୁଁ ଭାବୁଛି ରାଜ୍ୟସଭାରେ ଏଭଳି ଆସନ ବଦଳ କରିବା ପାଇଁ କେହି ଜାଣିଶୁଣି ନିଷ୍ପତ୍ତି ନେଇଛି। ଶିବସେନାର ଭାବନାକୁ ଆଘାତ ଦେବା ପାଇଁ ଓ ମୋ ସ୍ୱରକୁ ଦବାଇବା ପାଇଁ ଏଭଳି ବ୍ୟବସ୍ଥା ଗ୍ରହଣ କରାଯାଇଛି। ମୁଁ ଆପଣଙ୍କୁ ମନେ ପକାଇ ଦେବାକୁ ଚାହୁଁଛନ୍ତି ଯେ ଏନଡିଏ ବିରୋଧୀ ଦଳରେ ଥିବା ବେଳେ ମଧ୍ୟ ମୋତେ ତୃତୀୟ ଧାଡ଼ିରେ ଆସନ ମିଳିଥିଲା। ମୋ ବରିଷ୍ଠତାକୁ ଦୃଷ୍ଟିରେ ରଖି ଏଭଳି ପଦକ୍ଷେପ ନିଆ ଯାଇଥିଲା।

ଏବେ ମୋତେ ଓ ମୋ ଦଳକୁ ହଇରାଣ କରିବା ପାଇଁ ଜାଣିଶୁଣି ମୋ ଆସନକୁ ଅନ୍ୟତ୍ର ବଦଳି କରାଯାଇଛି। ଗୃହର ମର୍ଯ୍ୟାଦାକୁ ଦୃଷ୍ଟିରେ ରଖି ପ୍ରଥମ ୩ଟି ଧାଡ଼ି ମଧ୍ୟରେ ଥିବା ଗୋଟିଏ ଆସନକୁ ମୋ ପାଇଁ ଛଡ଼ା ଯିବା ଦରକାର। ମୋ ଆସନକୁ ପଛକୁ ନେବାର କାରଣ କିଛି କୁହାଯାଇ ନାହିଁ। ଶିବସେନା ଏବେ ବି ଏନଡିଏ ସହ ରହିଛି। ବିଧିବଦ୍ଧ ଭାବେ ଶିବସେନା ଏନ୍‌ଡିଏରୁ ବାହାରି ଯାଇଥିବା କଥା ଘୋଷଣା କରିନାହିଁ।”

ମହାରାଷ୍ଟ୍ରରେ ବିଜେପି ଓ ଶିବସେନା ମଧ୍ୟରେ ତିକ୍ତତା ସୃଷ୍ଟି ହୋଇଛି। ଶିବସେନା ଓ ବିଜେପି ଏକାଠି ନିର୍ବାଚନ ଲଢ଼ିଥିଲେ। ହେଲେ ନିର୍ବାଚନ ପରେ ଶିବସେନା ୫୦:୫୦ ଫର୍ମୁଲା ଲାଗୁ କରିବାକୁ କହିଥିଲେ ହେଁ ଏଥିରେ ବିଜେପି ରାଜି ହୋଇ ନଥିଲା। ଏବେ ବିଜେପିକୁ ବାଦ ଦେଇ ଶିବସେନା ମହାରାଷ୍ଟ୍ରରେ ସରକାର ଗଠନ କରିବାକୁ ଉଦ୍ୟମ ଆରମ୍ଭ କରିଛି। ଏପରି କି ଏନ୍‌ଡିଏ ସରକାରରେ ଏକମାତ୍ର ମନ୍ତ୍ରୀ ଭାବେ କାର୍ଯ୍ୟ କରୁଥିବା ଶିବସେନାର ସାଂସଦ ମଧ୍ୟ ଏହି ପଦରୁ ଇସ୍ତଫା ଦେଇ ସାରିଛନ୍ତି।