ନୀତୀଶଙ୍କ ଜେଡିୟୁରେ ବିଦ୍ରୋହର ସ୍ୱର! ଅନୱରଙ୍କ ପରେ ଶରଦ ଯାଦବ ଖୋଲିଲେ ମୁହଁ

ପାଟନା: ବିହାରରେ ପୁଣି ବଦଳିଛି ରାଜନୈତିକ ସ୍ଥିତି। ବିଜେପି ଛାଡ଼ି ଆର୍‌ଜେଡି ଓ କଂଗ୍ରେସର ହାତ ଧରିଥିବା ନୀତୀଶ କୁମାର ପୁଣି ଥରେ ଧରିଛନ୍ତି ବିଜେପିର ହାତ। ଫେରି ଆସିଛନ୍ତି ବିଜେପି ନେତୃତ୍ୱାଧୀନ ଏନ୍‌ଡିଏ ପରିବାରକୁ। ତେବେ ତାଙ୍କର ଏହି ନିଷ୍ପତ୍ତିକୁ ଜେଡିୟୁର ସମସ୍ତ ନେତା ଗ୍ରହଣ କରିପାରି ନାହାନ୍ତି। ତାଙ୍କର ଏ ନିଷ୍ପତ୍ତିକୁ ବିରୋଧ କରି ମୁହଁ ଖୋଲିଛନ୍ତି ଦୁଇ ଜଣ ନେତା। ସେମାନେ ହେଲେ ରାଜ୍ୟସଭା ସାଂସଦ ଅଲ୍ଲୀ ଅନୱର ଓ ଦଳର ପୂର୍ବତନ ଅଧ୍ୟକ୍ଷ ଶରଦ ଯାଦବ। ପ୍ରଥମେ ମୁହଁ ଖୋଲି ଥିଲେ ଅଲ୍ଲୀ ଅନୱର। ତା’ପରେ ପରେ ବିରୋଧ କରିଛନ୍ତି ଶରଦ ଯାଦବ। ସେ କହିଛନ୍ତି ଯେ ନୀତୀଶ କୁମାର ଭୁଲ୍ ନିଷ୍ପତ୍ତି ନେଇଛନ୍ତି। ସେ ଏଭଳି ନିଷ୍ପତ୍ତି ଏତେ ଶୀଘ୍ର ନେବାର ନ ଥିଲା। ଏହା ଦ୍ୱାରା ରାଜ୍ୟବାସୀଙ୍କ ନିକଟକୁ ଏକ ଭୁଲ୍ ବାର୍ତ୍ତା ଯାଇଛି।

ଏଠାରେ ସୂଚନାଯୋଗ୍ୟ, ଜେଡିୟୁରେ ୫ ଜଣ ମୁସ୍‌ଲିମ୍ ବିଧାୟକ ଥିବା ବେଳେ ଯାଦବ ସମୁଦାୟରୁ ୧୧ ଜଣ ବିଧାୟକ ଅଛନ୍ତି।

ସାଂସଦ ଅଲ୍ଲୀ ଅନୱର କହିଛନ୍ତି,“ନୀତୀଶ ତାଙ୍କ ଅନ୍ତରାତ୍ମା କଥା ଶୁଣି ବିଜେପି ସହିତ ହାତ ମିଳାଇଛନ୍ତି। କିନ୍ତୁ ମୋ ମନ କହୁଛି ଏହା ଠିକ୍ ନୁହେଁ।”