ସୋମନାଥ ମନ୍ଦିର ଉଡ଼ାଇ ଦେବାକୁ ଧମକ, ସୁରକ୍ଷା ବ୍ୟବସ୍ଥା କଡ଼ାକଡ଼ି

ଅହମ୍ମଦାବାଦ: ମୁମ୍ବାଇ ବିମାନବନ୍ଦର ପରେ ଗୁଜରାଟରେ ଥିବା ପ୍ରସିଦ୍ଧ ସୋମନାଥ ମନ୍ଦିରରକୁ ଆକ୍ରମଣ କରିବାକୁ ଆତଙ୍କବାଦୀମାନେ ଧମକ ଦେଇଛନ୍ତି । ମନ୍ଦିର ଉଡାଇ ଦେବାକୁ ଦେଇଛନ୍ତି ଧମକ। ମନ୍ଦିର ଟ୍ରଷ୍ଟକୁ ଏନେଇ ମିଳିଛି ଧମକପୂର୍ଣ୍ଣ ଚିଠି। ଚିଠି ଲେଖାଯାଇଛି ଗୁଜରାଟି ଭାଷାରେ।  ଚିଠିର ପ୍ରେରକରେ ଇଣ୍ଡିଆନ୍ ମୁଜାହିଦ୍ଦିନ ବୋଲି ଲେଖାଯାଇଛି। ଏହି ଚିଠି ମିଳିବା ପରେ ମନ୍ଦିର ଟ୍ରଷ୍ଟ ପକ୍ଷରୁ ତୁରନ୍ତ ପୋଲିସକୁ ସୂଚନା ଦିଆଯାଇଥିଲା । ସୂଚନା ପାଇବା ପରେ ମନ୍ଦିରର ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି। ମନ୍ଦିର ଅଞ୍ଚଳରେ ସତର୍କ ସୂଚନା ଜାରି କରାଯାଇଛି।  ବୋମା ନିଷ୍କ୍ରିୟକାରୀ ଦଳ ମନ୍ଦିର ମଧ୍ୟରେ ତନ୍ନ ତନ୍ନ କରି ଯାଞ୍ଚ କରିଥିଲେ । ତେବେ ସେପରି କିଛି ଆପତ୍ତିଜନକ ସାମଗ୍ରୀ ମିଳି ନ ଥିଲା।

ସୂଚନାଯୋଗ୍ୟ, ଏହା ପୂର୍ବରୁ  ଗତ ମଙ୍ଗଳବାର ଆତଙ୍କବାଦୀମାନେ ମୁମ୍ୱାଇ ଡୋମେଷ୍ଟିକ୍ ଏୟାରପୋର୍ଟ, ଅନ୍ତର୍ଜାତୀୟ ଏୟାରପୋର୍ଟ ସମେତ ତାଜ୍ ହୋଟେଲ୍ ନିକଟରେ ୫ଟି ଗାଡ଼ି ବିସ୍ଫୋରଣ କରିବାକୁ ଧମକ ଦେଇଥିଲେ।