ପାକିସ୍ତାନରେ ପ୍ରଥମ ହିନ୍ଦୁ ମହିଳା ଜଜ୍‌ ହେଲେ ସୁମନ୍‌ କୁମାରୀ

ଇସ୍‌ଲାମାବାଦ୍‌: ପାକିସ୍ତାନରେ ଜଣେ ହିନ୍ଦୁ ମହିଳାଙ୍କୁ ସିଭିଲ୍‌ କୋର୍ଟରେ ଜଜ୍‌ ଭାବେ ନିଯୁକ୍ତି ଦିଆଯାଇଛି। କୌଣସି ହିନ୍ଦୁ ମହିଳା ଜଜ୍‌ ହେବା ପାକିସ୍ତାନରେ ଏହା ପ୍ରଥମ ଘଟଣା। ନ୍ୟାୟିକ ଅଧିକାରୀ ପରୀକ୍ଷାରେ ପାସ୍‌ କରିବା ପରେ ମହିଳାଙ୍କୁ ସିଭିଲ୍‌ କୋର୍ଟରେ ନିଯୁକ୍ତି ଦିଆଯାଇଛି। ମହିଳା ଜଣଙ୍କ ହେଲେ ସିନ୍ଧ ପ୍ରଦେଶର କମ୍ବର-ଶହଦାଦକୋଟ୍‌ର ସୁମନ୍‌ କୁମାରୀ।

ସୁମନ୍‌ ହାଇଦ୍ରାବାଦ୍‌ରୁ ଏଲ୍‌ଏଲ୍‌ବି ପାସ୍‌ କରିବା ସହ କରାଚିର ଜାବାଷ୍ଟ ବିଶ୍ୱବିଦ୍ୟାଳୟରୁ ଲ’ରେ ମାଷ୍ଟର୍‌ ହାସଲ କରିଛନ୍ତି।

ସୁମନ୍‌ଙ୍କୁ ଡର ଥିଲା, ତାଙ୍କର ଓକିଲ ହେବା ନିଷ୍ପତ୍ତିକୁ ନିଜ ସମ୍ପ୍ରଦାୟର ଲୋକେ ସ୍ୱାଗତ କରିବେ ନାହିଁ। ହେଲେ ପରିବାର ଲୋକଙ୍କ ସମ୍ପୂର୍ଣ୍ଣ ସହଯୋଗ ତାଙ୍କ ସହ ଥିଲା। ସୁମନ୍‌ଙ୍କ ବାପା ପବନ କୁମାର କହିଛନ୍ତି, “ସୁମନ୍‌ କମ୍ବର-ଶହଦାଦକୋଟ୍‌ରେ ଗରିବଙ୍କୁ ମାଗଣାରେ ଆଇନ୍‌ ସହାୟତା ଦେବାକୁ ଚାହୁଁଛି। ସେ ଏକ କଠିନ କାମକୁ ନିଜ ପେଶା ଭାବେ ଗ୍ରହଣ କରିଛି। ମୋତେ ବିଶ୍ୱାସ ଅଛି, କଠିନ ପରିଶ୍ରମ ଓ ନିଷ୍ଠାପର ଭାବେ ସେ ନିଜ ଲକ୍ଷ୍ୟ ସ୍ଥଳରେ ପହଞ୍ଚିବ।”