ଟେଲିସ୍କୋପିକ୍ ସାଟେଲାଇଟ୍ ‘ଆଷ୍ଟ୍ରୋସାଟ’ର ଉତକ୍ଷେପଣ ସଫଳ

ଶ୍ରୀହରିକୋଟ୍ଟା: ମହାକାଶ ଗବେଷଣା କ୍ଷେତ୍ରରେ ଭାରତକୁ ଆଉ ଏକ ସଫଳତା । ସ୍ୱଦେଶୀ ଜ୍ଞାନକୌଶଳରେ ନିର୍ମିତ ଟେଲିସ୍କୋପିକ୍ ସାଟେଲାଇଟ୍ ଆଷ୍ଟ୍ରୋସାଟକୁ ମହାକାଶକୁ ପ୍ରେରଣ କରିଛି ଭାରତୀୟ ମହାକାଶ ଗବେଷଣା କେନ୍ଦ୍ର-ଇସ୍ରୋ । ଆଜି ଦିନ ୧୦ଟାରେ ଆନ୍ଧ୍ରପଦେଶର ଶ୍ରୀହରିକୋଟ୍ଟାଠାରେ ଥିବା ମହାକାଶ ଗବେଷଣା କେନ୍ଦ୍ରରୁ ପିଏସ୍ଏଲଭିସି-୩୦ ରକେଟ୍ ଜରିଆରେ ଆଷ୍ଟ୍ରୋସାଟକୁ ପଠାଯାଇଛି। ଉତକ୍ଷେପଣର କିଛି ସମୟ ପରେ ୧୫ ଶହ ୧୩ କିଲୋଗ୍ରାମ ଓଜନ ବିଶିଷ୍ଟ ଆଷ୍ଟ୍ରୋସାଟକୁ  ସଫଳତା ସହ କକ୍ଷପଥରେ ଅବସ୍ଥାପିତ କରିଛି ପିଏସ୍ଏଲଭିସି। ଏଥିସହ ଭାରତ ଆମେରିକା, ରୁଷିଆ, ଜାପାନ ଏବଂ ୟୁରୋପ ପରେ ନିଜର ସ୍ୱତନ୍ତ୍ର ସ୍ପେସ୍ ଅବଜରଭେଟୋରୀ ରଖିଥିବା ରାଷ୍ଟ୍ର ତାଲିକାରେ ସାମିଲ ହୋଇଛି। ଆଷ୍ଟ୍ରୋସାଟ୍ ମହାକାଶରେ ଗ୍ରହ ନକ୍ଷତ୍ରଗୁଡିକର ଗତିବିଧି ଲକ୍ଷ୍ୟ କରିବ। ଅତିକମରେ ଏହା ୫ବର୍ଷ ପର୍ଯ୍ୟନ୍ତ କାମ କରିବ।  ଆଷ୍ଟ୍ରୋସାଟ୍ ସହ ଆଉ ୬ଟି ବିଦେଶୀ ଉପଗ୍ରହକୁ ଆଜି ମହାକାଶକୁ ପ୍ରେରଣ କରିଥିଲା ଇସ୍ରୋ । ଏଥିମଧ୍ୟରୁ ୪ଟି ଉପଗ୍ରହ ହେଉଛି ଆମେରିକୀୟ କମ୍ପାନୀର ।