ବାଣ ଫୁଟା ସମ୍ପର୍କରେ କ’ଣ କହିଲେ ସୁପ୍ରିମକୋର୍ଟ, ଜାଣନ୍ତୁ କିଛି ତଥ୍ୟ ସଂକ୍ଷେପରେ

ନୂଆଦିଲ୍ଲୀ: ଦୀପାବଳିରେ ବାଣ ଫୁଟା ଉପରେ ସଂପୂର୍ଣ୍ଣ ବ୍ୟାନ୍‌ ଲଗା ଯାଇପାରିବ ନାହିଁ ବୋଲି ଆଜି ସୁପ୍ରିମକୋର୍ଟ ଏକ ରାୟ ଦେଇଛନ୍ତି। ତେବେ ଗ୍ରୀନ୍‌ ଦୀପାବଳି ପାଳନକୁ ସୁପ୍ରିମକୋର୍ଟ ଗୁରୁତ୍ୱ ଦେବା ସହ କମ୍‌ ପ୍ରଦୂଷଣ ଓ ଶବ୍ଦ କରୁଥିବା ବାଣ ବିକ୍ରି ଏବଂ ନିର୍ମାଣକୁ ସବୁଜ ସଙ୍କେତ ଦେଇଛନ୍ତି।

ତେବେ ସୁପ୍ରିମକୋର୍ଟ କ’ଣ ରାୟ ଦେଇଛନ୍ତି, ସେ ସମ୍ପର୍କରେ ପଢ଼ନ୍ତୁ

୧: ଦିପାବଳୀ ପୂର୍ବରୁ ସୁପ୍ରିମକୋର୍ଟ ଗ୍ରୀନ୍‌ ଦୀପାବଳି ଉପରେ ଗୁରୁତ୍ୱ ଦେଇ କମ୍‌ ପ୍ରଦୂଷଣ କରୁଥିବା ବାଣର ବ୍ୟବହାର କରିବାକୁ କହିଛନ୍ତି।

୨: ଦୀପାବଳିରେ ଲୋକମାନେ କେବଳ ରାତି ୮ରୁ ୧୦ ଟା ପର୍ଯ୍ୟନ୍ତ ବାଣ ଫୁଟାଇ ପାରିବେ।

୩: ନୂଆ ବର୍ଷ ଓ ଖ୍ରୀଷ୍ଟମାସ୍‌ରେ ଲୋକମାନେ ରାତି ୧୧.୪୫ରୁ ରାତି ୧୨.୩୦ ପର୍ଯ୍ୟନ୍ତ ବାଣ ଫୁଟାଇ ପାରିବେ।

୪: ଅନ୍‌ ଲାଇନ୍‌ କାରବାର କରୁଥିବା ଆମାଜନ୍‌ ଓ ଫ୍ଲିପ୍‌କାର୍ଟ ଭଳି ଇ-କର୍ମସ କମ୍ପାନୀମାନେ କୌଣସି ପ୍ରକାରର ବାଣ ବିକ୍ରି କରିପାରିବେ ନାହିଁ।

୫: ଯଦି ଅନଲାଇନ୍‌ରେ ବାଣ ବିକ୍ରି ହୁଏ, ତା’ହେଲେ ସଂପୃକ୍ତ କମ୍ପାନୀର ୱେବସାଇଟ୍‌କୁ ବନ୍ଦ କରାଯିବ ଏବଂ ଅଦାଲତ ଅବମାନନା ଅଭିଯୋଗରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

୬: ମାଳ ଚାଇନା ବାଣ ବା ଦୀର୍ଘ ସମୟ ଧରି ଗୋଟିଏ ପରେ ଗୋଟିଏ ଫୁଟିଲା ଭଳି ସିରିଜ ବାଣ ଦେଶରେ ବିକ୍ରି କିମ୍ବା ତିଆରି କରାଯାଇ ମାରିବ ନାହିଁ।

୭: କମ୍‌ ଶବ୍ଦ କରୁଥିବା ବାଣ ହିଁ କେବଳ ବିକ୍ରି ପାଇଁ ମାର୍କେଟରେ ଉପଲବ୍ଧ ହେବ।

୮: ଦିଲ୍ଲୀ ଏନ୍‌ସିଆର୍‌ରେ ସମସ୍ତେ କେମିତି ଅଧିକ ଲୋକ ସାମୁହିକ ଭାବେ ଦୀପାବଳି ଓ ଅନ୍ୟ ଉତ୍ସବକୁ ପାଳନ କରିପାରିବେ, ସେଥିପ୍ରତି କେନ୍ଦ୍ର ସରକାର ଲୋକଙ୍କୁ ଉତ୍ସାହିତ କରନ୍ତୁ ବୋଲି କୋର୍ଟ କହିଛନ୍ତି।

୯: ରାଜ୍ୟ ସରକାର ମଧ୍ୟ ବିଭିନ୍ନ ପୂଜାପର୍ବାଣୀରେ କେମିତି ଲୋକେ ସାମୁହିକ ଭାବେ ଏକାଠି ହୋଇ ଗୋଟିଏ ସ୍ଥାନରେ ବାଣ ଫୁଟାଇବେ, ତା’ର ବ୍ୟବସ୍ଥା କରନ୍ତୁ।

୧୦: ଯଦି ବ୍ୟାନ୍‌ ହୋଇଥିବା ବାଣ କୌଣସି ମାର୍କେଟରେ ବିକ୍ରି ହେଉଥିବା ଜଣାପଡ଼ିବ, ତା’ହେଲେ ଏଥିପାଇଁ ସଂପୃକ୍ତ ଅଞ୍ଚଳର ପୁଲିସ୍‌ ଷ୍ଟେସନ୍‌ ଅଧିକାରୀ ଦାୟୀ ରହିବେ ବୋଲି କୋର୍ଟ କହିଛନ୍ତି।