ଥାନେରେ କୋଠା ଭୁଶୁଡି ୧୧ ମୃତ, ୭ ଆହତ

ଥାନେ : ମହାରାଷ୍ଟ୍ରର ଥାନେରେ କୋଠା ଭୁଶୁଡ଼ି ୧୧ ଜଣଙ୍କ ମୃତ୍ୟୁ ହୋଇଛି। ଏହି ଘଟଣାରେ ୭ ଜଣ ଆହତ ହୋଇଥିବା ବେଳେ ଆହୁରି ଅନେକ ଭଙ୍ଗାକୋଠା ତଳେ ଚାପି ହୋଇ ରହିଥିବା ଆଶଙ୍କା କରାଯାଉଛି। ଥାନେର ବି କ୍ୟାବିନ ଅଞ୍ଚଳରେ ଏହି ଦୁର୍ଘଟଣା ଘଟିଛି। ଗତକାଲି ରାତି ପ୍ରାୟ ଦୁଇଟା ବେଳେ ତିନି ମହଲା ବିଶିଷ୍ଟ ଏହି କୋଠାଟି ଭୁଶୁଡ଼ି ପଡ଼ିଥିଲା। ଖବରପାଇ ଦୁର୍ଘଟଣା ସ୍ଥଳରେ ତୁରନ୍ତ ଅଗ୍ନିଶମ ଉଦ୍ଧାରାକରୀ ଦଳ ପହଞ୍ଚି ଲୋକଙ୍କୁ ଉଦ୍ଧାର କରିଥିଲେ। ଏନଡିଆରଏଫ୍ ପକ୍ଷରୁ ମଧ୍ୟ ଉଦ୍ଧାର କାର୍ଯ୍ୟ ଜାରି ରହିଛି। ଭଙ୍ଗା କୋଠାତଳେ ୧୫ରୁ ଅଧିକ ଲୋକ ଚାପି ହୋଇ ରହିଥିବା ଆଶଙ୍କା କରାଯାଉଛି। ଏହା ପୂର୍ବରୁ ୫୦ ବର୍ଷରୁ ଅଧିକ ପୁରୁଣା ଏହି କୋଠାଟିକୁ ଖାଲି କରିବା ଲାଗି ଥାନେ ମ୍ୟୁନିସିପାଲିଟି ପକ୍ଷରୁ ନିର୍ଦ୍ଦେଶ ଦିଆଯାଇଥିଲା। ଗତ ସପ୍ତାହରେ ମଧ୍ୟ ଥାନେରେ ସମାନ ଧରଣର ଏକ କୋଠା ଭୁଶୁଡ଼ିବାରୁ ଏଥିରେ ୧୦ ଜଣଙ୍କର ମୃତ୍ୟୁ ହୋଇଥିଲା।