ପଶ୍ଚିମବଙ୍ଗ: ଟ୍ରେନରେ ବିସ୍ଫୋରଣ, ୧୮ ଆହତ

କୋଲକାତା: ପଶ୍ଚିମ ବଙ୍ଗର ସିଲଦାରୁ କ୍ରିଷ୍ଣାନଗରକୁ ଯାଉଥିବା ଏକ ପାସେଞ୍ଜର ଟ୍ରେନରେ ମଙ୍ଗଳବାର ଭୋର ପ୍ରାୟ ୪ଟା ବେଳେ ବିସ୍ଫୋରଣ ଘଟିବାରୁ ୧୮ ଜଣ ଆହତ ହୋଇଛନ୍ତି। ୨ ଜଣଙ୍କ ଅବସ୍ଥା ଗୁରୁତର ଅଛି। ସମସ୍ତ ଆହତଙ୍କୁ କୋଲକାତାର ଆର.ଜି କର ମେଡିକାଲ କଲେଜରେ ଭର୍ତ୍ତି କରାଯାଇଛି। ବାରାକପୋର ଷ୍ଟେସନରେ ଅଟକ ରହିଥିବା ଏହି ଟ୍ରେନଟିରେ ପୁଲିସ,ରେଳବାଇ ପୁଲିସ ଓ ସିଆଇଡିର ବମ୍ ସ୍କ୍ୱାଡ୍ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଟ୍ରେନର ୫ ନମ୍ବର ବଗିରେ ଦୁଇଟି ଦୁର୍ବୃତ୍ତ ଦଳ ବୋମା ଫୋପାଡ଼ି ଥିଲେ। ସେହିଭଳି ଟ୍ରେନରେ ବିସ୍ଫୋରକ ନିଆଯାଉଥିବା ଆଶଙ୍କାଙ୍କୁ ବି ପୁଲିସ ସଂପୂର୍ଣ୍ଣ ଭାବେ ଏଡ଼ାଇ ଯାଇନାହିଁ। ଏ ଦିଗ ଉପରେ ବି ତଦନ୍ତ ଚାଲିଛି। ଅନ୍ୟପକ୍ଷରେ କେତେ ଜଣ ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ବିସ୍ଫୋରଣ ପରେ ଟ୍ରେନରୁ ଜଣେ ବ୍ୟକ୍ତି ଓହ୍ଲାଇଥିଲେ ଓ ତା’ ହାତରେ ଏକ ଅସ୍ତ୍ର ଥିଲା।

ଟ୍ରେନଟି ସିଲଦାରୁ ଭୋର ୩ଟା ୨୦ ମିନିଟରେ ବାହାରି କ୍ରିଷ୍ଣାନଗର ଯିବାବେଳେ ବାରାକପୋର ଓ ଟିଟାଗଡ଼ ରେଳଷ୍ଟେସନ ମଧ୍ୟରେ ଏହି ଘଟଣା ଘଟିଥିଲା। ସିଲଦାରୁ ଏହା ଦିନର ପ୍ରଥମ ପାସେଞ୍ଜର ଟ୍ରେନ ହୋଇଥିବାରୁ ଏଥିରେ ଅଧିକ ଲୋକ ନଥିଲେ। ନହେଲେ ହତାହତଙ୍କ ସଂଖ୍ୟା ଅଧିକ ହୋଇଥାଆନ୍ତା।