ଅଗ୍ନି -୩ର ବ୍ୟାବହାରିକ ପରୀକ୍ଷଣ ସଫଳ

ଭୁବନେଶ୍ୱର: ମଧ୍ୟମ ଦୂରଗାମୀ ବାଲେଷ୍ଟିକ ମିଜାଇଲ ଅଗ୍ନି-୩ର ବ୍ୟବହାରିକ ପରୀକ୍ଷଣ ସଫଳ ହୋଇଛି । ଭଦ୍ରକ ଜିଲ୍ଲା ଧାମରା ହ୍ୱିଲର ଦ୍ୱୀପରେ ଥିବା ୪ ନମ୍ବର ଲଞ୍ଚପ୍ୟାଡରୁ ସକାଳ ୯ ଟା ୫୫ ମିନିଟରେ ଏହି ପରୀକ୍ଷଣ କରାଯାଇଥିଲା । ପରୀକ୍ଷା ପାଇଁ ଭାରତୀୟ ସ୍ଥଳସେନାର ଷ୍ଟ୍ରାଟେଜିଜ ଫୋର୍ସ କମାଣ୍ଡର ଟିମ୍ ସହିତ ଡିଆରଡିଓର ବରିଷ୍ଠ ବୈଜ୍ଞାନିକ ମାନେ ହ୍ୱିଲର ଦ୍ୱୀପରେ ପହଞ୍ଚି ଥିଲେ । ଅଗ୍ନି-୩ ମିଜାଇଲର ଲମ୍ବ ୧୭ ମିଟର ଥିବାବେଳେ ଓସାର ୨ ମିଟର ଏବଂ ଓଜନ ୪୮ କୁଇଣ୍ଟାଲ ।

ଉତକ୍ଷେପଣ ସ୍ଥଳରୁ ସାଢେ ୩ ହଜାରରୁ ୫ ହଜାର କିଲୋମିଟର ପର୍ଯ୍ୟନ୍ତ ଏହାର ଲକ୍ଷ୍ୟଭେଦ କ୍ଷମତା ରହିଛି । ଅଗ୍ନି-୩ ମିଜାଇଲ ଭାରତର କୌଣସି ବି ସ୍ଥାନରୁ ବିଶେଷକରି ଚୀନକୁ ଟାର୍ଗେଟ କରିପାରିବ । ଡିଆରଡିଓ ଓ ଭାରତ ଡାଇୟନାମିଜ ଲିମିଟେଡ ଦ୍ୱାରା ପ୍ରସ୍ତୁତ ଏହି କ୍ଷେପଣାସ୍ତ୍ର ସେକେଣ୍ଡ ପ୍ରତି ୫ରୁ ୬ କିଲୋମିଟର ବେଗରେ ଗତି କରିପାରିବ ।

ଆବଶ୍ୟକତା ଅନୁସାରେ ଏହି ମିଜାଇଲକୁ ଟ୍ରାନ୍ସପୋର୍ଟର ଇରେଜ୍ଟର ଲଞ୍ଜର ଓ ରେଳ ଲଞ୍ଚରରୁ ଉତକ୍ଷେପଣ କରାଯାଇପାରିବ । ଅଗ୍ନି-୩ ମିଜାଇଲ ୨୦୧୧ ମସିହା ଜୁନମାସରେ ସ୍ଥଳସେନାର ସମାଲ କରାଯାଇଛି ।