ଦୁଇ ଚୋରଙ୍କ ସହିତ ତିନି ପୋଲିସ୍ ଅଟକ

ଅନୁଗୋଳ: ଅନୁଗୋଳ ଜିଲ୍ଲା ବନ୍ତଳା ଥାନା ଅନ୍ତର୍ଗତ ଚନ୍ଦନପୁର ଗାଁରେ ବିଦ୍ୟୁତ୍‌ ତାର ଚୋରି କରୁଥିବା ଦୁଇ ଜଣ ଚୋରଙ୍କ ସହ ସେମାନଙ୍କୁ ଉଦ୍ଧାର କରିବା ପାଇଁ ଆସିଥିବା ୩ ଜଣ ପୋଲିସ କର୍ମଚାରୀଙ୍କୁ ଆଜି ସ୍ଥାନୀୟ ଲୋକେ ଦୀର୍ଘ ସମୟ ଧରି ଅଟକ ରଖିଥିଲେ। ବନ୍ତଳା ଆଇଆଇସି ଘଟଣାସ୍ଥଳରେ ପହଞ୍ଚି ଲୋକମାନଙ୍କୁ ବୁଝାସୁଝା କରିବା ପରେ ସେମାନେ ଉଭୟ ଚୋର ଓ ପୋଲିସ କର୍ମଚାରୀଙ୍କୁ ଛାଡ଼ି ଦେଇଥିଲେ । ଅଭିଯୁକ୍ତ ଦ୍ୱୟକୁ ପୋଲିସ୍ ନିଜ ହେପାଜତକୁ ନେଇଛି।

ଗତକାଲି ବିଳମ୍ବିତ ରାତିରେ ବିଦ୍ୟୁତ୍‌ ତାର ଚୋରି କରିବା ପାଇଁ ପ୍ରାୟ ପାଞ୍ଚ ଛଅ ଜଣ ଚୋର ଗାଁକୁ ଆସିଥିଲେ। ଚୋରମାନେ ବିଦ୍ୟୁତ୍‌ ତାର ଚୋରି କରୁଥିବା ବେଳେ ଗ୍ରାମବାସୀମାନେ ସେମାନଙ୍କୁ ଧରିଥିଲେ। ତେବେ ସେମାନଙ୍କ ମଧ୍ୟରୁ ତିନି ଚାରି ଜଣ ଖସି ପଳାଇବାରେ ସକ୍ଷମ ହୋଇଥିବା ବେଳେ ଦୁଇ ଜଣ ଧରାପଡ଼ିଥିଲେ। ଖବର ପାଇ ବନ୍ତଳା ପୋଲିସ୍ ସେଠାରେ ପହଞ୍ଚି ଥିଲା। ସେମାନେ ଚୋର ଦ୍ୱୟଙ୍କୁ ଲୋକଙ୍କ କବଳରୁ ମୁକୁଳାଇବା ପାଇଁ ଚେଷ୍ଟା କରିଥିଲେ। ତେବେ ଗାଁ ଲୋକେ ଆସିଥିବା ତିନି ପୋଲିସ୍ କର୍ମଚାରୀଙ୍କୁ ମଧ୍ୟ ଅଟକ ରଖିଥିଲେ।

 

ଗାଁରେ ବିଦ୍ୟୁତ୍‌ ତାର ଚୋରି ହେଉଥିବା ନେଇ ଲୋକେ ପୂର୍ବରୁ ପୋଲିସ୍‌ ନିକଟରେ ଅଭିଯୋଗ କରିଥିଲେ।  ଗ୍ରାମବାସୀ ବାରମ୍ବାର ବାରମ୍ବାର ଅଭିଯୋଗ କରିବା ସତ୍ତ୍ୱେ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଇ ନଥିଲା। ଏହା ସହ ବିଦ୍ୟୁତ୍‌ ବିଭାଗର ନିଷ୍କ୍ରିୟତା ଯୋଗୁଁ ବାରମ୍ବାର ଚନ୍ଦନପୁର ସମେତ ଆଖପାଖ ଗାଁରେ ବିଦ୍ୟୁତ୍‌ ତାର ଚୋରି ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।

ବନ୍ତଳା ଆଇଆଇସି କହିଛନ୍ତି,“ଚନ୍ଦନପୁର ଏକ ଜଙ୍ଗଲିଆ ଅଞ୍ଚଳ। ଏଠାରେ  ହାତୀମାନଙ୍କ ଉପଦ୍ରବ ଲାଗି ରହିଥାଏ। ସେଥିପାଇଁ ଭୟରେ ଗାଁରେ ଲୋକେ ରାତିରେ ବାହାରକୁ ବାହାରନ୍ତି ନାହିଁ। ସେଥିପାଇଁ ଚୋରମାନଙ୍କୁ ବିଦ୍ୟୁତ୍‌ ତାର ଚୋରି କରିବା ପାଇଁ ସୁବିଧା ହେଉଛି। ଘଟଣା ତଦନ୍ତ କରାଯାଉଛି।”