କଟକ (ଓଡ଼ିଶା ରିପୋର୍ଟର): କଟକରେ ପୁଣି ଏନ୍କାଉଣ୍ଟର। ଏଥର ଦୁଇ ଦୁର୍ଦ୍ଦାନ୍ତ ଅପରାଧୀ ଆହତ ହୋଇଛନ୍ତି। ସେମାନଙ୍କ ଗୁଡ଼ିରେ ବାଜିଛି ଗୁଳି। ସେମାନେ ହେଲେ ମନୋଜ କୁମାର ମହାରଣା ଓରଫ ମଙ୍ଗୁ ଓ ସୁଧାକର ପାତ୍ର ଓରଫ ଲିପୁ। ସେମାନଙ୍କୁ ବଡ଼ ମେଡ଼ିକାଲରେ ଭର୍ତ୍ତି କରାଯାଇଛି। ପ୍ରତାପନଗରୀ ଗୁଳିକାଣ୍ଡରେ ଏହି ଦୁଇ ଜଣ ଅଭିଯୁକ୍ତ ଥିବା ପୋଲିସ କହିଛି।
ମଙ୍ଗୁ ଓ ଲିପୁ ସଦର ଥାନା ଅନ୍ତର୍ଗତ କୁଆକାଖ ନଦୀରେ ଥିବା ଜାଣିପାରି କମିଶନରେଟ୍ ପୋଲିସ ଚଢ଼ାଉ କରିଥିଲା। ମାତ୍ର ସେମାନେ ପୋଲିସ ଉପରକୁ ଗୁଳି ଚଳାଇ ଥିଲେ। ଏହା ଜବାବରେ ପୋଲିସ ଗୁଳି ଚଳାଇ ଥିଲା। ଫଳରେ ମଙ୍ଗୁ ଓ ଲିପୁଙ୍କ ଗୁଡ଼ରେ ବାଜିଥିଲା ଗୁଳି। ପୋଲିସ ସେମାନଙ୍କୁ ଗିରଫ କରିବା ସହିତ ୨ଟି ମାଉଜର ଓ ୧୫ରୁ ଅଧିକ ଗୁଳି ଜବତ କରିଛି।
ସୂଚନାରୁ ପ୍ରକାଶ, ହୋଲି ଅବସରରେ ପ୍ରତାପନଗରୀ ଧାକୁଲେଇ ବିଦ୍ୟାପୀଠ ପଡ଼ିଆରେ ଭୋଜି ଚାଲିଥିଲା। ଏହି ସମୟରେ ଦୁଇଟି ବାଇକରେ ୪ ଜଣ ଆସି ଭୋଜିକୁ ବିରୋଧ କରିବା ସହିତ ଅନ୍ଧାଧୂନ୍ ଗୁଳି ଚଳାଇ ଫେରାର ହୋଇଯାଇ ଥିଲେ। ଫଳରେ ୩ ଜଣ ଗୁରୁତର ଆହତ ହୋଇଥିଲେ। ସେମାନଙ୍କୁ ବଡ଼ ମେଡ଼ିକାଲରେ ଭର୍ତ୍ତି କରାଯାଇଥିଲା। ଅଭିଯୋଗକୁ ଭିତ୍ତିକରି ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।